ممبئی میں ایک عمارت کے گرنے سے سات افراد ہلاک اور متعدد زخمی

تصویر کے کاپی رائٹ AMIR kHAN

انڈيا کے صنعتی شہر ممبئی میں جمعرات کی صبح ایک پرانی عمارت گر کر تباہ ہوگئی تھی جس میں اب تک سات افراد کے ہلاک اور متعدد کے زخمی ہونے کی خبر ہے۔

یہ واقعہ جنوبی ممبئی کے بائیکلہ کے علاقے میں جی جے روڈ پر صبح پیش آيا۔

امدادی کارروائیاں جاری ہیں اور ملبے تلے دبے ہوئے لوگوں کو نکالنے کی کوششیں کی جا رہی ہے۔ یہ علاقہ گنجان آباد ہے اس لیے امدادای کام میں دشواریاں آرہی ہیں۔

تصویر کے کاپی رائٹ RAJIVE SINGH

ممبئی میں پولیس حکام کے مطابق اس واقعے میں ہلاک ہونے والے افراد کی تعداد سات ہوگئی ہے اور 15 افراد زخمی ہوئے ہیں۔

کہا جا رہا ہے کہ عمارت کے ملبے کے نیچے 30 سے 35 افراد اب بھی پھنسے ہوئے ہیں۔

مقامی پولیس کے مطابق مذکورہ عمارت تین منزلہ تھی جبکہ آگ پر قابو پانے والے عملے کا کہنا ہے کہ یہ پانچ منزلہ عمارت تھی۔

تصویر کے کاپی رائٹ AMIR KHAN

آس پاس کے لوگوں نے بتایا ہے کہ عمارت پر دو اضافی منزلیں غیر قانونی طور پر تعمیر کی گئی تھیں۔

زخمی ہونے والے افراد کو جے جے ہسپتال میں بھرتی کیا گيا ہے۔ ہسپتال کی انتظامیہ کے مطابق زخمیوں میں سے پانچ کی حالت نازک ہے۔

ایک روز قبل ہی ممبئی میں زبردست بارش ہوئی تھی اور اسی کے بعد یہ واقعہ پیش آيا ہے۔ کہا جا رہا ہے کہ عمارت پرانی تھی اور اس کی تعمیر نو پر غور کیا جا رہا تھا۔

گذشتہ تقریبا ایک ماہ میں ممبئی میں عمارت منہدم ہونے کا یہ تیسرا واقعہ ہے جس میں متعدد افراد ہلاک ہوچکے ہیں۔

متعلقہ عنوانات

اسی بارے میں