گورکھپور میں ٹرینوں کی ٹکر، 12 مسافر ہلاک

تصویر کے کاپی رائٹ THINKSTOCK
Image caption بھارت کے ریل نظام کا شمار دنیا کے سب سے بڑے ٹرین نیٹ ورکس میں ہوتا ہے

بھارتی ریاست اترپردیش کے مشرقی شہر گورکھپور میں دو ریل گاڑیوں کے تصادم میں 12 مسافر ہلاک جبکہ 45 افراد زخمی ہوگئے ہیں۔

یہ حادثہ گورکھپور کینٹ ریلوے سٹیشن کے قریب منگل اور بدھ کی درمیانی رات میں پیش آیا۔

شمال مشرقی ریلوے کے عوامی رابطہ افسر ایس پی مشرا نے بی بی سی کو بتایا کہ تصادم کسان ایکسپریس اور لکھنؤ برونی ایکسپریس کے درمیان ہوا۔

ان کا کہنا تھا کہ لکھنؤ ایکسپریس گورکھپور کے کینٹ سٹیشن پر کھڑی تھی کہ کسان ایکسپریس نے اسے ٹکر مار دی جس کی وجہ سے لکھنؤ برونی ایکسپریس کے دو ڈبے پٹڑی سے اتر گئے۔‘

حادثے کے بعد اس روٹ پر ریلوے ٹریفک معطل ہوگئی۔

ریلوے کے رابطہ افسر آلوک کمار سنگھ نے بی بی سی کو بتایا کہ ’ابتدائی تحقیقات کے مطابق یہ حادثہ کسان ایکسپریس کے ڈرائیور اور شریک ڈرائیور کی غلطی کی وجہ سے ہوا ہے۔‘

ان کا کہنا تھا کہ ’ان دونوں کو فوری طور پر معطل کر دیا گیا ہے۔‘

آلوک کمار نے ہلاکتوں کی تصدیق کرتے ہوئے بتایا کہ زخمیوں میں سے بھی 12 افراد شدید طور پر زخمی ہیں اور ان کی حالت تشویشناک ہے۔

تمام زخمیوں کو ضلع سرکاری ہسپتال اور گورکھپور میڈیکل کالج میں داخل کیا گیا ہے۔

اتر پردیش کی حکومت نے مرنے والوں کے اہل خانہ کے لیے فی کس دو لاکھ روپے اور زخمیوں کے علاج کے لیے 50، 50 ہزار روپے کی امداد کا اعلان بھی کیا ہے۔