طوفان ’ہد ہد‘ بھارتی سرحد سے ٹکرا گیا، متعدد ہلاک

تصویر کے کاپی رائٹ JAMIE KEN NEDY
Image caption تین لاکھ سے زائد افراد کو محفوظ مقامات پر پہنچایا گیا ہے

خلیج بنگال سے اٹھنے والا سمندری طوفان ہدہد بھارت کے مشرقی ساحلوں سے ٹکرا گیا ہے جس سے شدید نقصان ہوا ہے اور تقریباً تین لاکھ افراد کو محفوظ مقامات پر پہنچایا گیا ہے۔ آندھرا پردیش میں اب تک تین افراد کے ہلاک ہونے کی اطلاع ہے۔

محکمہ موسمیات کے مطابق اگلے چھ گھنٹے تک یہ طوفان زمین پر اپنا سب سے زیادہ اثر دکھائے گا۔

وشاكھاپٹنم کے ساحلی علاقوں سے گزرتے ہوئے اس طوفان میں 205 کلومیٹر فی گھنٹے کی رفتار سے تیز ہوائیں چل رہی ہیں اور اس کے ساتھ بارش بھی ہو رہی ہے۔

اس دوران ریاست آندھراپردیش اور اڑیسہ میں سینکڑوں درخت جڑ سے اکھڑ گئے اور بجلی کے تار زین پر آگرے جس سے بجلی گُل ہو گئی۔

خدشہ ہے کہ طوفان سے اونچی لہریں اٹھیں گی اور نچلے علاقے سیلاب کی زد میں آ جائیں گے۔

دونوں ریاستوں میں سینکڑوں ریلیف کیمپ لگا دیے گئے ہیں۔ حکام کا کہنا ہے کہ اگلے پانچ سے چھ گھنٹے بہت اہم ہیں۔

بھارت میں قومی آفات سے نمٹنے کے محکمے این ڈی آر ایف کے مطابق آندھر پردیش کے علاقے شريكاكلم اور وشاكھاپٹنم میں درخت کے نیچے دبنے سے تین افراد مارے گئے ہیں۔

بھارت کے محکمہ موسمیات کے مطابق یہ طوفان بہت تباہی پھیلا سکتا ہے۔

تصویر کے کاپی رائٹ AFP
Image caption ہنگامی حالات سے نمٹنے کے لیے بھارتی بحریہ تیار ہے

ریاست اڑیسہ میں حکام کا کہنا ہے کہ مزید تین لاکھ لوگوں کو محفوظ مقامات پر جانے کی ہدایات دی گئی ہیں۔

ہنگامی حالات سے نمٹنے کے لیے بھارتی بحریہ کو چوکس کر دیا گیا ہے۔

خصوصی رلیف کمشنر پردیپ کمار مہا پاترہ کا کہنا ہے کہ اس طوفان کا سامنا کرنے کے لیے حکام اور انتظامیہ پوری طرح سے تیار ہیں۔

1999 میں اُڑیسہ میں آنے والے ’سُپر سائیکلون‘ سے دس ہزار سے زائد افراد ہلاک ہوئے تھے۔

گذشتہ اکتوبر میں اڑیسہ اور آندھرا پردیش سے گزرنے والے پہلِن طوفان کے پیشِ نظر پانچ لاکھ افراد کو محفوظ مقامات پر منتقل کر دیا گیا تھا۔

تصویر کے کاپی رائٹ AFP
Image caption اڑیسہ میں ابھی صرف تیز ہوائیں چل رہی ہیں

بھارت کے شمالی ساحل اور بنگلہ دیش میں اپریل سے نومبر کے درمیان سمندری طوفان آتے رہتے ہیں جس سے بڑے پیمانے پر جانی اور مالی نقصان ہوتا ہے۔

اس طوفان کی زد میں جو ریاستیں آنے والی ہیں وہاں امدادی ٹیموں کو روانہ کر دیا گیا ہے۔

اسی بارے میں