’سالگرہ اور شادی نےخوشی کودوبالا کردیا‘

تصویر کے کاپی رائٹ EPA

بھارتی وزیراعظم نریندر مودی نے پاکستان کے مختصر دورے کے بعد نئی دہلی پہنچنے پر لاہور میں اپنے مختصر قیام اور پاکستانی وزیراعظم نواز شریف کے ساتھ ملاقات کا احوال سماجی رابطے کی ویب سائٹ ٹوئٹر پر بیان کیا ہے۔

’نریندر مودی کا دورہ خیرسگالی کے لیے تھا‘

لاہور کا سفر: واجپئی سے مودی تک

مودی کے دورے سے میڈیا میں ہلچل

بھارتی وزیراعظم نریندر مودی نے دہلی پہنچنے پر اپنے ٹوئٹر پیغام میں کہا ہے کہ انھوں نے شریف خاندان کے ساتھ شام کا اچھا وقت گزارا۔

ان کا کہنا تھا کہ ’نواز صاحب کی سالگرہ اور ان کی نواسی کی شادی نے خوشی کو دگنا کر دیا۔‘

تصویر کے کاپی رائٹ Twitter

وزیراعظم مودی نے ایک اور ٹویٹ میں کہا کہ ’نواز شریف صاحب کا میرے استقبال کے لیے اور میرے واپس جاتے وقت لاہور ہوائی اڈے پر آنے سے میں ذاتی طور پر متاثر ہوا ہوں۔‘

پاکستان کی طرح بھارت میں بھی سوشل میڈیا پر نریندر مودی کی لاہور آمد کا چرچا رہا، اس کا اندازہ اس امر سے لگایا جاسکتا ہے کہ بھارت میں ٹوئٹر پر ’وزیراعظم نریندر مودی‘ اور ’لاہور‘ ٹرینڈ کرتا رہا۔

جبکہ ’مودی ان انڈیا‘ کا ہیش ٹیگ عالمی سطح پر ٹرینڈ ہوتا رہا۔

وزیراعظم نریندر مودی لاہور سے دہلی پہچنے پر سابق بھارتی وزیراعظم اٹل بہاری واجپئی سے ملاقات کے لیے ان گھر بھی گئے جہاں انھوں نے اٹل بہاری واجپئی کو سالگرہ کی مبارک باد بھی دی۔

تصویر کے کاپی رائٹ Twitter

خیال رہے کہ سابق بھارتی وزیراعظم اٹل بہاری واجپئی اور وزیراعظم نواز شریف کی تاریخ پیدائش 25 دسمبر ہے۔

نریندر مودی نے اس حوالے سے کہا کہ ’نواز شریف صاحب کی اٹل جی کے لیے شفقت بہت زیادہ متاثر کن ہے۔‘

ان کا کہنا تھا کہ نواز شریف نے اٹل بہاری واجپئی کے ساتھ اپنی ملاقاتوں کو یاد کیا اور ’مجھ سے ان کی جانب سے اٹل جی کو نیک خواہشات کا کہا۔‘

تصویر کے کاپی رائٹ Twitter

واضح رہے کہ نواز شریف نے سنہ 1998 میں امریکہ میں ملاقات کے دوران بھارتی وزیراعظم اٹل بہاری واجپئی کو پاکستان آنے کی دعوت دی تھی جسے قبول کرتے ہوئے وہ 20 فروری 1999 کو بذریعہ دوستی بس لاہور پہنچے اور معاہدۂ لاہور پر دستخط کیے جس میں دونوں ممالک نے علاقائی امن کے لیے ایٹمی ہتھیاروں کے حصول کی دوڑ روکنے پر اتفاق کیا تھا۔

بھارتی وزارت برائے خارجہ امور کے ترجمان نے آج کے دن کو بھارتی سفارت کاری کا منفرد دن قرار دیا ہے۔

اسی بارے میں