امریکہ کی فلسطین کے حامیوں کو تنبیہہ

امریکہ نے فلسطین کے حامی ایک گروپ کے کارکنوں کو خبردار کیا ہے کہ وہ اسرائیل کی جانب سے غزہ کے محاصرے کو توڑنے کی کوشش نہ کریں۔

امریکہ اور دیگر آٹھ ممالک کے کارکن دو کشتیوں پر طبی سامان لے کر بدھ کے روز ترکی سے غزہ کی جانب روانہ ہوئے ہیں۔ اسرائیلی فوج نے کہا ہے کہ وہ انہیں محاصرہ توڑنے کی اجازت نہیں دے گی۔

امریکہ نے کہا ہے کہ ترکی نے یقین دہانی کروائی ہے کہ اِن امدادی کشتیوں کے ہمراہ وہ اپنا کوئی جنگی بحری جہاز نہیں بھیجے گا۔

ترکی اور اسرائیل کے درمیان تعلقات اُس وقت کشیدہ ہو گئے تھے جب اٹھارہ ماہ قبل غزہ کے لیے جانے والی ایسی ہی امدادی کشتی پر اسرائیلی فوج کی فائرنگ سے نو ترک باشندے ہلاک ہو گئے تھے۔