’الطاف کے خلاف مقدمات درج کیے جائیں‘

سندھ ہائی کورٹ میں مہاجر قومی موومنٹ کے چیئرمین آفاق احمد نے ایک درخواست دائر کی ہے، جس میں گذارش کی گئی ہے کہ متحدہ قومی موومنٹ کے سربراہ الطاف حسین کے خلاف دہشت گردی پھیلانے کے الزام میں مقدمات درج کیے جائیں۔

آفاق احمد نے جمعے کے روز ذاتی طور پر یہ درخواست عدالت میں جمع کرائی ہے۔ انہوں نے میڈیا سے بات کرتے ہوئے بتایا کہ انیس سو چھیانوے میں حقیقی کے مرکز بیت الحمزہ پر جو حملہ ہوا تھا جوائنٹ انٹروگیشن میں یہ تسلیم کیا گیا ہے کہ متحدہ قومی موومنٹ کی قیادت کے کہنے پر یہ حملہ ہوا تھا۔

آفاق کے مطابق اس حملے کا دہشت گردی ایکٹ کے تحت مقدمہ درج کیا جائے اور جو مطلوبہ افرد ملک میں موجود نہیں ہیں، ریڈ وارنٹ جاری کرکے انہیں انٹرپول کے ذریعے واپس لایا جائے اور انہیں شامل تفتیش کیا جائے۔

حقیقی کے سربراہ نے پیپلز پارٹی کے باغی رہنما ڈاکٹر ذوالفقر مرزا سے رابطوں کا اعتراف کیا ہے اور بتایا کہ ان کے دیگر سیاسی رہنماؤں سے بھی رابطے ہیں۔