شام: بین الاقوامی بحران پیدا ہوسکتا ہے

عرب لیگ اور اقوام متحدہ کے مشترکہ ایلچی کوفی عنان نے شام کے سلسلے میں منعقد ہونے والے عالمی وزرائے خارجہ کے ایک اجلاس میں متنبہ کیا ہے کہ تشدد کے خاتمے کے لیے طریقۂ کار پر اتفاق نہ ہونے کی صورت میں بین الاقوامی بحران پیدا ہوسکتا ہے۔

سوئس شہر جنیوا میں ایک اعلیٰ سطح کے اجلاس سے خطاب کرتے ہوئے انہوں نے کہا کہ اگر عالمی برادری متفق نہ ہو سکی تو شام میں شہریوں کی مزید ہلاکتوں کے لیے بین الاقوامی طاقتیں بھی ذمہ دار ہوں گی۔

شام کے معاملے پر روس اور مغربی ممالک کے درمیان اس بات پر اختلاف ہے کہ کیا صدر بشارالاسد کے پاس اقتدار رہنا چاہیے یا نہیں اور روس اس بات کی مخالفت کرتا رہا ہے کہ شامی صدر کو اقتدار چھوڑنے پر مجبور کیا جائے۔