معافی کی اپیل نہیں کروں گا: سنجے دت

بھارتی اداکار سنجے دت نے کہا ہے کہ وہ سپریم کورٹ کی جانب سے پانچ سال کی سزا کے فیصلے کے خلاف اپیل نہیں کریں گے اور دی گئی مدت میں خود کو قانون کے حوالے کر دیں گے۔

جمعرات کو ممبئی میں اپنی بہن اور رکن پارلیمان پریہ دت کے ہمراہ صحافیوں سے بات کرتے ہوئے سنجے دت نے کہا کہ وہ سپریم کورٹ کی دی گئی ایک ماہ کی مدت میں جیل جائیں گے۔

سنجے نے کہا کہ وہ قانون کا احترام کرتے ہیں اور عدالت کے فیصلے کا احترام کریں گے۔ انہوں نے کہا کہ یہ ان کے اور ان کی خاندان کے لیے ایک مشکل گھڑی ہے۔

انہوں نے جذباتی لہجے میں کہا کہ ’میں اپنی سزا ختم کرانے کے لیے معافی کی درخواست نہیں کروں گا اس لیے اس بارے میں بحث کی کوئی وجہ نہیں ہے۔ مجھے لگتا ہے کہ ایسے کئی اور لوگ ہیں جنہیں معافی دی جانی چاہیے۔‘