دنیا کا آخری سفید گینڈا اب ڈیٹنگ ایپ پر

گینڈا تصویر کے کاپی رائٹ Reuters
Image caption کارکنوں کو خدشہ ہے کہ 43 سالہ سوڈان مطلوبہ رقم جمع ہونے سے قبل ہی مر سکتا ہے یا مار دیا جاسکتا ہے

دنیا میں نایاب نسل کے آخری رہ جانے والے نر شمالی سفید گینڈے کا ڈیٹنگ ایپلی کیشن ٹنڈر اکاؤنٹ بنایا گیا ہے۔

یہ کینیا میں گینڈوں کے تحفظ کے لیے کام کرنے والے کارکنوں کی جانب سے چندہ اکٹھا کرنے کی کوششوں کا حصہ ہے۔

بڑھتی ہوئی عمر کے اس نایاب نسل کے نرگینڈے کے دو باقی رہ جانے والی مادہ گینڈوں کے ساتھ افزائش نسل کی کوششوں ناکام ہوگئی تھیں۔

کارکنوں کا کہنا ہے کہ گینڈوں کے لیے مصنوعی طریقے سے افزائش نسل یعنی ان ویٹرو فرٹیلائزیشن (آئی وی ایف) تکنیک تیار کرنے کے لیے ایک کروڑ ڈالر درکار ہیں۔

شمالی سفید گینڈوں کی نسل کو ختم کرنے میں غیرقانونی شکاریوں کا اہم کردار رہا ہے جو اس کے سینگ کے لیے ان کو مارتے رہے ہیں۔

آخری بچ جانے والے نر گینڈے کو 24 گھنٹے سخت حفاظتی حصار میں رکھا جاتا ہے۔

خبررساں ادارے روئٹرز کے مطابق سوڈان نامی اس گینڈے کے ٹنڈر ایپ پر بنائے گئے اکاؤنٹ میں ان کا تعارف ان الفاظ میں بیان کیا گیا ہے کہ ’میری نسل کی تقدیر کا دارومدار میرے پر ہے۔ میں دباؤ میں اچھی کارکردگی دکھاتا ہوں۔ میں صرف گھاس کھاتا ہوں اور مٹی میں کھیلتا ہوں۔ کوئی مسائل نہیں ہیں۔ اگر یہ بات اہمیت رکھتی ہے تو میرا چھ فٹ قد ہے اور 5000 پاؤنڈز وزنی ہوں۔‘

تصویر کے کاپی رائٹ Reuters
Image caption آخری بچ جانے والے نر گینڈے کو 24 گھنٹے سخت حفاظتی حصار میں رکھا جاتا ہے

گینڈوں کے تحفظ اور بچاؤ کے لیے کام کرنے والے کارکنوں کو امید ہے کہ سوڈان کا ٹنڈر پروفائل انھیں فرٹلائزیشن کے عمل کے لیے مطلوبہ رقم جمع کرنے میں مدد دے سکتا ہے۔

کارکنوں کے مطابق سائنسدان سوڈان کے نطفے کو آخری دو رہ جانے والی مادہ گینڈوں 17 سالہ ستو یا 27 سالہ ناجن کے انڈوں سے تیار ہونے والے ایمبریو کو جنوبی سفید گینڈے کی نسل سے تعلق رکھنے والی مادہ میں منتقل کریں گے۔

ایک اندازے کے مطابق غیرقانونی شکاری شمالی سفید گینڈے کے سینگ 50 ہزار ڈالر فی کلو کے حساب سے فروخت کرتے ہیں جس سے ان کی مالیت سونے یا کوکین سے بھی زیادہ بن جاتی ہے۔

کارکنوں کو خدشہ ہے کہ 43 سالہ سوڈان مطلوبہ رقم جمع ہونے سے قبل ہی مر سکتا ہے یا مار دیا جاسکتا ہے۔

گینڈوں کے ماہر رچرڈ وگنے کا کہنا ہے کہ ’یہ خطرہ ہمیشہ سے موجود ہے۔ وہ بوڑھا ہے، وہ ضرور جلد مر جائے گا۔ جب تک مشرق بعید میں گینڈوں کی سینگوں کی طلب رہے گی، یہ خطرہ ہمیشہ موجود رہے گا۔‘

متعلقہ عنوانات

اسی بارے میں