کاربن ڈائی آکسائیڈ جذب کرنے والا نیا مرکب

آخری وقت اشاعت:  منگل 12 جون 2012 ,‭ 15:54 GMT 20:54 PST

برطانوی محققین نے کاربن ڈائی آکسائڈ جزب کرنے کے لیے نیا مرکب بنایا ہے۔

برطانوی محققین نے ایک نیا مرکب تشکیل دیا ہے جو کہ ماحول سے کاربن ڈائی آکسائیڈ کو جذب کر سکتا ہے۔

NOTT-202 نامی یہ مرکب ایک دھاتی نامیاتی فریم ورک ہے جو کہ ایک ’سپنج‘ کی طرح کام کرتا ہے۔

یہ مرکب زیادہ دباؤ میں مختلف گیسوں کو جذب کرنا شروع کرتا ہے اور جب اس پر سے دباؤ ہٹایا جاتا ہے تو باقی تمام گیسیں تو اس میں سے خارج ہو جاتی ہیں جبکہ کاربن ڈائی آکسائیڈ اس میں ہی جذب رہتی ہے۔

’نیچر میٹیریلز‘ نامی جریدے میں شائع ہونے والی اس تحقیق کا کہنا ہے کہ اس مرکب کے استعمال سے ماحول میں سے کاربن کم کرنے میں مدد مل سکتی ہے جبکہ کارخانوں اور بجلی گھروں سے خارج ہونے والی گیسوں سے بھی کاربن ڈائی آکسائیڈ نکالی جا سکتی ہے۔

دھاتی نامیاتی فریم ورک پر مبنی مرکبوں کو بہت عرصے سے گیسوں کے جذب کرنے کے لیے موزوں سمجھا جاتا ہے مگر اس سے پہلے کے مرکب مختلف گیسوں میں فرق نہیں کر سکتے تھے۔

دھاتی نامیاتی مرکبات کے ذرات (مالیکیولز) کے اندر دھاتی ذرات ہوتے ہیں اور وہ کاربن کے ذرات سے منسلک ہوتے ہیں۔ یہی وجہ ہے کہ ان کو دھاتی نامیاتی مرکب کہا جاتا ہے۔

ان پیچیدہ ذرات سے ایک ذراتی جال بنایا جاتا ہے جو کہ گیسوں کو جذب کرنے کے لیے استعمال کیا جا سکتا ہے تاہم اب تک ان مرکبات میں جذب ہونے والی گیسوں کی مقدار انتہائی کم تھی۔

اس تحقیق کے مصنفوں کا کہنا ہے کہ ’ان مرکبات میں مختلف گیسوں کی تفریق کرنے کی صلاحیت بڑھانا، ان کے عام استعمال کے لیے کارآمد بننے میں اہم چیلنج ہے‘۔

یہ تحقیق ناٹنگھم یونیورسٹی اور نیو کاسل یونیورسٹی میں شروع کی گئی جہاں سائنسدانوں نے ایک کیمیائی نظام بنایا جس نے کاربن ڈائی آکسائیڈ کو علیحدہ کرنے اور اس کی قابلِ ذکر حد تک مقدار کو جذب کرنے کی صلاحیت دکھائی۔

’ایکسرے ڈیفریکشن‘ اور تفصیلی کمپیوٹر ماڈلوں کی مدد سے محققین نے یہ واضح کیا کہ اس مرکب میں دو ذراتی فریم ورک ہیں جو کہ اس طرز سے جُڑے ہوئے ہیں جو کہ کاربن ڈائی آکسائیڈ کو جذب کرنے کے لیے انتہائی موزوں ہیں۔

محققین کا کہنا ہے کہ یہ مرکب ایک نئی ساخت کا مرکب ہے۔

اسی بارے میں

متعلقہ عنوانات

BBC © 2014 بی بی سی دیگر سائٹوں پر شائع شدہ مواد کی ذمہ دار نہیں ہے

اس صفحہ کو بہتیرن طور پر دیکھنے کے لیے ایک نئے، اپ ٹو ڈیٹ براؤزر کا استعمال کیجیے جس میں سی ایس ایس یعنی سٹائل شیٹس کی سہولت موجود ہو۔ ویسے تو آپ اس صحفہ کو اپنے پرانے براؤزر میں بھی دیکھ سکتے ہیں مگر آپ گرافِکس کا پورا لطف نہیں اٹھا پائیں گے۔ اگر ممکن ہو تو، برائے مہربانی اپنے براؤزر کو اپ گریڈ کرنے یا سی ایس ایس استعمال کرنے کے بارے میں غور کریں۔