بے خوابی کا یادداشت پر اثر

Image caption نیند کو قدرت کے بہترین عطیے میں شمار کیا جاتا ہے

دماغ کے سکین سے پتہ چلا ہے کہ بے خوابی کے شکار لوگوں کا ذہن ان لوگوں کے مقابلے مختلف ڈھنگ سے کام کرتا ہے جن کی نیند پوری ہوتی ہے۔

امریکہ کے سین ڈیاگو کی کیلیفورنیا یونیورسٹی میں کی جانے والی تحقیق میں پتہ چلا ہے جن لوگوں کو اچھی نیند نہیں آتی ان کے ذہن کو اپنی توجہ مرکوز کرنے کے لیے کافی جدوجہد کرنی پڑتی ہے۔

تاہم دیگر ماہرین کا کہنا ہے کہ نیند کا تعلق دماغ کی وا‏ئرنگ سے ہے جو کہ نیند کے احساس کو متاثر کرتی ہیں۔

کم خوابی رشتے بگڑنے کا سبب بنتی ہے

یادداشت کمزور ہونے کا راز دریافت

’پورے چاند کی راتوں میں نیند کم آتی ہے‘

نیند کے متعلق یہ تازہ تحقیق ’سلیپ‘ یعنی نیند نامی جرنل میں شائع ہوئی ہے۔

بے خوابی کے شکار افراد کو رات میں سونے میں دقت پیش آتی ہے جس کا اثر دن میں ان کی کارکردگی پر پڑتا ہے۔ ان میں کسی چیز کے تئیں دیر سے رد عمل اور چیزوں کا بروقت یاد نہ آنا شامل ہے۔

اس تحقیق کے دوران ایسے 25 افراد کا جنہیں کم خوابی کی شکایت ہے کا مقابلہ ان 25 افراد سے کیا گیا جو خود کو اچھی نیند حاصل کرنے والوں میں شمار کرتے ہیں۔

ان کے دماغ کا ایم آر آئی سکین کیا گیا اور اسی دوران ان سے یادداشت کی جانچ کے لیے تیار کردہ کافی چیلنج بھرے امتحانات لیے گئے۔

نیند پر تحقیق کرنے والے محققوں میں سے ایک پروفیسر سین ڈرمنڈ نے کہا ’ہم نے یہ جانا کہ جو لوگ بے خوابی کا شکار تھے ان کے دماغ کا وہ حصہ ٹھیک سے حرکت نہیں کررہا تھا جو کہ عملی یادداشت کے لیے اہم ہوتے ہیں اور ان کے دماغ کا وہ حصہ بھی نہیں سویا تھا جس کا اس عمل سے بظاہر کوئی تعلق نہیں تھا۔‘

انھوں نے مزید کہا کہ ’اس تحقیق سے ہمیں یہ سمجھنے میں مدد ملے گی کہ بے خوابی کے شکار لوگوں کو صرف رات میں سونے میں تکلیف نہیں ہوتی بلکہ ان کے دماغ دن میں بھی اچھی طرح سے کام نہیں کرتے۔‘

برطانیہ میں نیند پرتحقیق کرنے والے ایک ریسرچر ڈاکٹر نیل سٹینلی کا کہنا ہے کہ ہرچند کہ دونوں گروپوں کی نیند کی کوالٹی بہت حد تک یکساں تھی تاہم ایک گروپ نے بے خوابی یا کم خوابی کی شکایت کی تھی۔

انھوں نے کہا: ’مرغی کیا ہے اور انڈا کیا ہے؟ کیا ان کے دماغ مختلف ہیں جس کی وجہ سے ان کو خراب نیند کی شکایت ہے۔‘

’شاید وہ رات میں ہونے والی چیزوں کو دوسری طرح سے لیتے ہیں اور یہ بھی ہو سکتا ہے کہ جو چیز ان کی کارگزار یادداشت اور توجہ کو مرکوز کرنے کی صلاحیت کو متاثر کر رہی ہے وہی ان کی نیند کو بھی متاثر کر رہی ہو۔‘

اسی بارے میں