سی آئی اے اب ٹوئٹر پر بھی

تصویر کے کاپی رائٹ Twitter
Image caption ٹوئٹر پر آمد کے چند گھنٹوں میں ہی سی آئی اے کو فالو کرنے والوں کی تعداد دو لاکھ سے بڑھ گئی

امریکی خفیہ ادارے سی آئی اے نے سماجی رابطے کی مائیکرو بلاگنگ ویب سائٹ ٹوئٹر پر اپنا اکاؤنٹ کھولا ہے اور پہلی ٹویٹ میں مزاحیہ انداز اپنایا ہے۔

CIA@ کے ٹوئٹر ہینڈل سے ٹویٹ کیے جانے والے پیغام میں کہا گیا ہے کہ ’ہم نہ تو تصدیق اور نہ ہی تردید کر سکتے ہیں کہ یہ ہماری پہلی ٹویٹ ہے۔‘

جمعے کو اس اکاؤنٹ کے آغاز کے چند ہی گھنٹوں کے اندر اس کے فالوورز کی تعداد دو لاکھ دس ہزار سے تجاوز کر چکی ہے۔

ابتدائی طور پر اس معاملے میں ٹوئٹر پر صارفین کی جانب سے شکوک و شبہات بھی ظاہر کیے گئے کہ آیا کہ سی آئی اے کا ہی اکاؤنٹ ہے یا نہیں۔

تاہم یہ معاملہ اس وقت صاف ہوگیا جب خفیہ ادارے کی جانب سے پریس ریلیز میں کہا گیا ہے کہ سی آئی اے نے ٹوئٹر اور فیس بک دونوں ویب سائٹس پر جگہ بنا لی ہے۔

خبر رساں ادارے ایسوسی ایٹڈ پریس کے مطابق سی آئی اے کو اس کا ٹوئٹر ہینڈل بھی ٹوئٹر کو اس فرد کے خلاف درخواست دے کر حاصل کرنا پڑا جو پہلے اسے ایجنسی کے نام پر استعمال کر رہا تھا۔

سی آئی اے کی ٹوئٹر پر آمد کی خبر سن کر ٹوئٹر استعمال کرنے والے افراد کی جانب سے بھی دلچسپ بیانات سامنے آئے۔

امریکہ میں پاکستان کے سابق سفیر حسین حقانی نے ٹویٹ کی کہ ’سی آئی اے نے برسوں لوگوں کو فالو کیا(پیچھا کیا)، اب ٹوئٹر استعمال کرنے والوں کے پاس سی آئی اے کو فالو کرنے کا موقع ہے۔‘

ایسوسی ایٹڈ پریس کے مطابق سی آئی اے کی ٹوئٹر پر آمد کو کچھ لوگوں نے سوشل میڈیا کے لیے برے دن سے بھی تعبیر کیا۔

الیکٹرانک پرائیویسی کے لیے سرگرم کارکن پارکر ہگنز نے ٹویٹ کی کہ ’لوگ کہتے ہیں کہ فیس بک اس وقت سے بیکار ہوگئی جب آپ کی دادی اس پر آ جائے۔ میں نہیں جانتا کہ میں سی آئی اے کے ٹوئٹر پر آنے کو کیا سمجھوں۔‘

اسی بارے میں