بھارتی خلائی مشن مریخ کے مدار میں داخل

تصویر کے کاپی رائٹ epa
Image caption منگل يان تقریباً 300 دنوں کے سفر کے بعد 24 ستمبر کو صبح تقریباً آٹھ بجے مریخ کے مدار میں داخل ہو گيا

بھارت میں خلائی تحقیق کے ادارے اسرو کا خلائی جہاز ’منگل یان‘ کامیابی کے ساتھ مریخ کے مدار میں داخل ہوگیا ہے۔

بھارتی وزیر اعظم نریندر مودی نے اس موقعے پر بھارت کی کامیابی پر سائنس دانوں کو مبارک باد دیتے ہوئے کہا ہے کہ آج بھارت دنیا کا پہلا ملک بن گیا ہے جس نے پہلی ہی بار میں یہ کامیابی حاصل کی ہے۔

امریکی خلائی ادارے ناسا نے بھی بھارت کو اس کامیابی پر مبارک باد پیش کی ہے۔

غربت کے باوجود سائنسی تجربے ضروری: پروفیسر ہودبھائی

اسرو نے بدھ کی صبح سات بج کر 17 منٹ پر مریخ سیارے کے لیے روانہ کی جانے والی بھارت کی خلائی گاڑی ’منگل یان‘ کا مائع یا سیال ایندھن والا انجن چلانا شروع کر دیا تھا۔

اسرو کے مطابق انجن چلانے کا عمل کامیاب رہا ہے اور یہ ٹھیک طور پر کام کر رہا ہے۔

مریخ مہم کے اس فیصلہ کن مرحلے میں مکمل 24 منٹ تک جہاز کے انجن کو چلایا گیا اور یہ کامیابی کے ساتھ خلائی گاڑی کو سرخ سیارے کے مدار میں داخل کرنے میں کامیاب رہا۔

تصویر کے کاپی رائٹ ISRO
Image caption بھارت کے خلائی مشن کے انتہائي حساس لمحوں میں بھارتی سائنس دان بنگلور میں اسرو کے دفتر میں موجود رہے اور بھارتی وزیر اعظم بھی اس موقعے پر وہیں تھے

اسرو کے سائنس دانوں کو مبارک باد دیتے ہوئے بھارتی وزیر اعظم نے کہا: ’آج تاریخ رقم کی گئی ہے۔ ہم نے ناممکن کو ممکن کر دکھایا ہے۔ میں سبھی بھارتیوں اور اسرو کے سائنس دانوں کو مبارک باد دیتا ہوں۔ کم وسائل کے باوجود یہ کامیابی سائنس دانوں کی ہمت اور مردانگی کی وجہ سے ملی۔‘

انھوں نے مزید کہا کہ ’جس کم خرچ میں ہم نے یہ کامیابی حاصل کی ہے اس سے زیادہ میں تو ہالی وڈ کی فلم بنتی ہے۔‘

اس مرحلے پر اسرو کو اس بات کا خیال رکھنا تھا کہ منگل یان اتنا سست نہ ہو جائے کہ مریخ کی سطح سے ٹکرا جائے، یا اس کی رفتار اتنی بھی تیز نہ ہو کہ وہ مریخ کے کشش ثقل سے باہر خلا میں کہیں کھو جائے۔

منگل يان تقریباً 300 دنوں کے سفر کے بعد 22 ستمبر کو مریخ کے کشش ثقل کے دائرے میں داخل ہوا تھا۔

غربت کے باوجود سائنسی تجربے ضروری: پروفیسر ہودبھائی

بھارتی وزیرِ اعظم نریندر مودی بھی مشن کے اس تاریخی لمحے کو دیکھنے کے لیے بنگلور میں واقع اسرو کے نگرانی سینٹر میں موجود تھے۔

تصویر کے کاپی رائٹ ISRO
Image caption بدھ کو صبح سات بجے کے بعد اس مشن کا انتہائی حساس عمل شروع ہوا تھا

بھارت دنیا کا پہلا ایسا ملک بن گیا ہے جو اپنی پہلی ہی کوشش میں مریخ کے مدار میں اپنی خلائی گاڑی کو بھیجنے میں کامیاب رہا۔

بھارت نے اس مشن پر تقریباً 450 کروڑ روپے خرچ کیے جو کہ دوسرے ممالک کے مقابلے بہت کم ہے۔

اگر سب کچھ درست رہا تو منگل يان آئندہ چھ مہینوں کے دوران مریخ کی فضا کا مطالعہ کرے گا۔

وہاں یہ میتھین گیس کا پتہ لگائے گا اور اس کے ساتھ ہی پر اسرار کائنات کے متعلق اس سوال کے جواب کا بھی سراغ لگائے گا کہ کیا ہم اس کائنات میں اکیلے ہیں؟

یہ بھی اندازہ لگایا جاتا ہے کہ مدار میں داخل ہونے کے کچھ ہی گھنٹوں بعد یہ مریخ کی تصاویر بھیجنا شروع کر دے گا۔

یہ امید کی جا رہی ہے کہ اس مہم سے مریخ کا پانی کیسے ختم ہو گیا جیسے اہم سوالات کو سمجھنے میں بھی مدد ملے گی۔

اسی بارے میں