مائیکرو سافٹ کی نئی فٹنس ڈیوائس

تصویر کے کاپی رائٹ MICROSOFT
Image caption مائیکرو سافٹ نے اس سے پہلے سنہ 2007 میں ہیلتھ والٹ کے نام سے میڈیکل ریکارڈ رکھنے کا آلہ متعارف کرایا تھا

امریکی ٹیکنالوجی کمپنی مائیکرو سافٹ نے کلائی پر باندھنے والی فٹنس ڈیوائس یا جسمانی تندرستی سے متعلق معلومات فراہم کرنے والا آلہ متعارف کرایا ہے۔

یہ آلہ صارف کو اس کی نیند اور ورزش سے متعلق معلومات فراہم کرتا ہے اور یہ سمارٹ فون کے ذریعے ہیلتھ سروس سے بھی منسلک ہو گا۔

مائیکرو سافٹ کا یہ آلہ کمپنی کے آن لائن سٹور پر 199 امریکی ڈالر میں فروخت ہوگا۔

یہ آلہ ایک دفعہ چارج ہونے پر دو دن تک چل سکتا ہے۔ اس میں دس سینسرز لگے ہیں جو دل کی دھڑکن، کیلوریز، ذہنی تناؤ، حتیٰ کہ صارف کے دھوپ میں رہنے کے بارے میں معلومات بھی فراہم کرتے ہیں۔

مائیکرو سافٹ نے اس سے پہلے سنہ 2007 میں ہیلتھ والٹ کے نام سے میڈیکل ریکارڈ رکھنے کا ایک آلہ متعارف کرایا تھا اور اس نئے آلے کی مدد سے اب اس نے ڈیجیٹل ہیلتھ کے شعبے میں شریک ہونے کی ایک اور کوشش کی ہے۔

کمپنی نے اپنی ایک ای میل بیان میں کہا کہ ’یہ مائیکرو سافٹ کے صحت، فٹنس اور پہننے کی کیٹیگری میں آلات کے لیے کئی سالوں پر محیط ویژن کا آغاز ہے۔‘

بیان میں کہا گیا کہ ’ہم اس شعبے میں مکمل ارادے اور تیاری کے ساتھ داخل ہونا چاہتے ہیں اور اس کا آغاز پہلے امریکہ میں کر رہے ہیں۔‘

ٹیکنالوجی کی دنیا کی بڑی کمپنیوں ایپل، سام سنگ اور گوگل نے صحت کے شعبے میں خدمات پیش کی ہیں اور وہ صحت سے متعلق پہننے والے آلات کی مارکیٹ میں مانگ بڑھانے کی کوشش کر رہے ہیں۔

تاہم مائیکرو سافٹ کا یہ آلہ باقی کمپنیوں سے اس لیے مختلف ہے کیونکہ یہ تمام بڑے موبائلز کے ایکو سسٹم کے ساتھ چل سکتا ہے اور یہ سماجی ربطوں کی ویب سائٹوں فیس بک اور ٹوئٹر سے بھی منسلک ہو سکتا ہے۔

اسی بارے میں