خلائی گاڑی کی یادداشت کی بحالی کے لیے ہیکنگ کا سہارا

تصویر کے کاپی رائٹ nasa
Image caption روور آپرچیونٹی کو کچھ تکنیکی مسائل کا سامنا ہے۔

10 سال سے سیارہ مریخ کا مشاہدہ کرنے والے خلائی ربوٹ اوپورچیونٹی کو کچھ تکنیکی مسائل کا سامنا ہے جسے ناسا کے ماہرین اب ہیک کر کے ٹھیک کرنے کی کوشش کریں گے۔

اوپورچیونٹی کی دیکھ بھال کرنے والی ٹیم کا خیال ہے کہ مسئلہ ربوٹ کی فلیش میموری کے ساتھ ہے۔

ناسا کا خیال ہے کہ اسے روور کے سافٹ ویئر کو ہیک کرنے کا طریقہ مل گیا ہے، جس کی مدد سے وہ نقص کو ٹھیک کر سکیں گئے۔

ڈسکوری نیوز سے بات کرتے ہوئے ناسا کے پروجیکٹ مینیجر جان کیلس نے روور اوپورچیونٹی کی خرابی کی وضاحت کرتے ہوے بتایا کہ اوپورچیونٹی میں بھی ایک عام کمپیوٹر کی طرح دو اقسام کی میموری سٹوریج ہیں، یعنی مستقل میموری جیسے فلیش میموری یا ہارڈ ڈرائیو جس میں ڈیٹا کمپیوٹر کے بند ہونے کے باوجود محفوظ رہتا ہے اور عارضی میموری جیسے رینڈم ایکسس میموری، جو مشین کے بند ہونے پر ڈیٹا کو ضائع کر دیتی ہے۔

شاید پرانی ہو جانے کے باعث اوپورچیونٹی کی مستقل میموری کے ہارڈ ویئر میں کوئی خرابی پیدا ہو گئی ہے۔ اس وجہ سے یہ تمام ڈیٹا کو عارضی میموری میں سٹور کر رہی ہے جو اوپورچیونٹی کے بند ہونے پر ضائع ہو جاتا ہے۔

تصویر کے کاپی رائٹ nasa
Image caption روور نے مریخ پر زندگی کے حوالے سے بہت اہم معلومات بھجیں ہیں۔

ناسا کا کہنا ہے کہ خرابی میں دن بہ دن اضافہ ہوتا جا رہا ہے اور کچھ مواقع پر اس کا مشن کنٹرول رابطہ بھی منقطع ہوا ہے۔

مسئلے کو حل کرنے کے لیے ناسا کی ٹیم روور کے سافٹ ویئر کو ہیک کرنے کی کوشش کر رہی ہے، تا کہ یہ فلیش میموری کے ناقص حصے کو نظر انداز کر کے صیح حصے پر مستقل طور پر ڈیٹا سٹور کرے۔

جان کیلس کے مطابق اس عمل میں دو ہفتے لگ سکتے ہیں، ان کا مزید کہنا تھا کہ ’ایسا محسوس ہو تا ہے کہ اوپورچیونٹی اپنی مفید زندگی کے اختتام کی طرف بڑھ رہی ہے، یہ آپ کے عمر رسیدہ والدین کی طرح ہے جو دیکھنے میں تو صحت مند نظر آتے ہیں مگر ان کو کسی وقت بھی دل یا فالج کا دورہ پڑسکتا ہے، ہمیں بھی ہر وقت ڈر رہتا ہے کہ کہیں اوپورچیونٹی کو کچھ ہو نہ جائے۔‘

یاد رہے کہ روور کو صرف تین ماہ کے ایک مشن پر مریخ پر بھیجا گیا تھا اور اگر اب یہ خراب بھی ہو جائے تو ناسا اس بات پر مطمئن ہے کہ یہ پہلے ہی اپنے ابتدائی مقصد سے تجاوز کر چکی ہے۔

گذشتہ دس سالوں میں روور نے مریخ پر زندگی کے حوالے سے بہت اہم معلومات بھیجی ہیں۔

اسی بارے میں