دہشت گردی کا خطرہ، صارفین کو مطلع کرنے کی ایپ

تصویر کے کاپی رائٹ AFP

فرانس کی حکومت نے ایک موبائل ایپلیکیشن جاری کی ہے جس کے ذریعے دہشت گردی کی صورت میں عوام کو متنبہ کیا جا سکے گا۔

یہ ایپلیکیشن فرانس میں جمعہ سے شروع ہونے والے فٹ بال ٹورنامنٹ یورو 2016 سے قبل لانچ کی جا رہی ہے۔

فرانسیسی وزارت داخلہ نے ایک بیان میں کہا ہے ’اس ایپ کے ذریعے کسی بھی حملے کی صورت میں اس علاقے کے آس پاس افراد کو مطلع کیا جائے گا۔‘

فرانسیسی حکومت کا کہنا ہے کہ یہ ایپ نومبر میں پیرس میں ہونے والے حملوں کے بعد تیار کی گئی۔ واضح رہے کہ پیرس حملوں میں 130 افراد ہلاک ہوئے تھے۔

برطانوی دفتر خارجہ نے منگل کو متنبہ کیا تھا کہ سٹیڈیم، شائقین کے ہجوم اور ٹرانسپورٹ کی جگہ پر ممکنہ طور پر حملہ کیے جا سکتے ہیں۔

تصویر کے کاپی رائٹ Getty

فرانسیسی وزارت داخلہ کے مطابق صارفین آٹھ مختلف جغرافیائی زونز میں ایمرجنسی الرٹ حاصل کرنے کے لیے رجسٹریشن کرا سکتے ہیں۔

الرٹ کے ذریعے صارفین کو مختصر طور پر مطلع کیا جائے گا کہ کہاں کیاں ہوا ہے اور محفوظ رہنے کے لیے کیا کریں۔

میٹرو نیوز کے مطابق یہ الرٹ بے آواز ہوں گے اور نہ ہی فون وائبریٹ ہو گا تاکہ اگر کوئی صارف چھپا ہوا ہے تو اس کی جگہ کی نشاندہی نہ ہو سکے۔

حکومت نے زور دیا ہے کہ صارفین کی پرائیویسی کا تحفظ کیا جائے گا۔

اس ایپ کو بعد میں سیلابوں اور دیگر ایمرجنسی صورتحال میں صارفین کو مطلع کرنے کے لیے بھی استعمال کیا جائے گا۔

اسی بارے میں