مورگن، بریتھ ویٹ اور نارائن پاکستان سپر لیگ کھیلیں گے

تصویر کے کاپی رائٹ Getty Images
Image caption کھلاڑیوں کی بولی کے بعد انگلینڈ کے اوئن مورگن کو پشاور زلمی نے پلاٹینم کیٹگری میں حاصل کیا ہے

پاکستان سپر لیگ میں حصہ لینے والی پانچوں فرنچائز ٹیموں نے بدھ کی شب دبئی میں ڈرافٹنگ کے بعد اپنی ٹیموں کو حتمی شکل دے دی ہے۔

کھلاڑیوں کی بولی کے بعد انگلینڈ کے اوئن مورگن کو پشاور زلمی نے پلاٹینم کیٹگری میں حاصل کیا ہے۔

واضح رہے کہ اوئن مورگن انگلینڈ کے ون ڈے اور ٹی ٹوئنٹی کپتان ہیں تاہم انھوں نے سکیورٹی کے خدشات کے سبب انگلینڈ کی ٹیم کے ساتھ بنگلہ دیش کا دورہ کرنے سے انکار کردیا تھا۔

بنگلہ دیشی آل راؤنڈر شکیب الحسن بھی پشاور زلمی کی نمائندگی کریں گے۔ پہلی پاکستان سپر لیگ میں وہ کراچی کنگز کی ٹیم میں شامل تھے۔

لاہور قلندر نے نیوزی لینڈ کے برینڈن مک کیولم کو پلاٹینم کیٹگری میں حاصل کیا ہے جبکہ سری لنکا کے سابق کپتان کمار سنگاکارا کراچی کنگز کی طرف سے کھیلیں گے۔

سنگاکارا پہلی پاکستان سپر لیگ میں کوئٹہ گلیڈی ایٹرز کی سپلیمنٹری کیٹگری میں شامل تھے۔

ویسٹ انڈیز کو اس سال ورلڈ ٹی ٹوئنٹی کے فائنل میں لگاتار چار چھکے لگا کر کامیابی سے ہمکنار کرنے والے کارلوس بریتھ ویٹ کو کوئٹہ گلیڈی ایٹرز نے حاصل کیا ہے۔

تصویر کے کاپی رائٹ Getty Images
Image caption کراچی کنگز نے ویسٹ انڈیز کے کرس گیل اور کیرون پولارڈ کی خدمات حاصل کرلی ہیں۔

لاہور قلندر نے پاکستانی لیگ سپنر یاسر شاہ اور ویسٹ انڈین سپنر سنیل نارائن کو بھی اپنے سکواڈ میں شامل کیا ہے۔

کراچی کنگز نے ویسٹ انڈیز کے کرس گیل اور کیرون پولارڈ کی خدمات حاصل کرلی ہیں۔

انگلینڈ کے کیون پیٹرسن بدستور کوئٹہ گلیڈی ایٹرز کی طرف سے کھیلیں گے جبکہ ویسٹ انڈیز کے آندرے رسل اور آسٹریلیا کے شین واٹسن بدستور اسلام آباد یونائٹڈ میں شامل رہیں گے۔

متعلقہ عنوانات

اسی بارے میں