پاکستان سپر لیگ: ویسٹ انڈیز کے ڈیرن سیمی پشاور زلمی کے کپتان مقرر

Image caption ڈیرن سیمی کی قیادت میں ویسٹ انڈیز نے اس سال انڈیا میں آئی سی سی ورلڈ ٹی ٹوئنٹی جیتا تھا

پاکستان سپر لیگ کھیلنے والی پشاور زلمی نے شاہد آفریدی کی جگہ ویسٹ انڈیز کے آل راؤنڈر ڈیرن سیمی کو کپتان مقرر کیا ہے۔

پشاور زلمی نے پاکستانی کرکٹ ٹیم کے سینیئر بیٹسمین یونس خان کو ٹیم کی رہنمائی کی ذمہ داری سونپتے ہوئے بیٹنگ کنسلٹنٹ بھی مقرر کیا ہے۔

مورگن، بریتھ ویٹ اور نارائن پاکستان سپر لیگ کھیلیں گے

پاکستان سپر لیگ کے دوسرے سیزن میں مک کیولم لاہور اور گیل کراچی سے کھیلیں گے

اس بات کا اعلان خود شاہد آفریدی نے دبئی میں پاکستان سپر لیگ کی ڈرافٹنگ کی تقریب کے دوران کیا۔

شاہد آفریدی نے اس موقع پر یونس خان اور ڈیرن سیمی کو سٹیج پر مدعو کیا اور ڈیرن سیمی کو مخاطب کرتے ہوئے کہا کہ آپ کے کرکٹ بورڈ نے آپ کی عزت نہیں کی لیکن ہمیں پتہ ہے کہ عزت کیسے کی جاتی ہے۔

واضح رہے کہ ڈیرن سیمی کی قیادت میں ویسٹ انڈیز نے اس سال انڈیا میں آئی سی سی ورلڈ ٹی ٹوئنٹی جیتا تھا۔

فائنل کے اختتام پر ڈیرن سیمی نے جذباتی انداز میں تقریر کرتے ہوئے اپنے کرکٹ بورڈ پر تنقید کی تھی کہ وہ مبینہ طور پر اپنے کھلاڑیوں کا خیال رکھنے میں ناکام رہا ہے۔

ورلڈ ٹی ٹوئنٹی کے فوراً بعد ڈیرن سیمی کو نہ صرف کپتانی سے ہٹادیا گیا تھا بلکہ انھیں عام کھلاڑی کی حیثیت سے بھی ٹیم میں شامل نہیں کیا گیا۔

متعلقہ عنوانات

اسی بارے میں