ڈھاکہ ٹیسٹ میں بنگلہ دیش کی فتح، سیریز برابر

مہدی حسن تصویر کے کاپی رائٹ AP
Image caption مہدی حسن نے اس میچ میں کل 12 وکٹیں حاصل کیں

ڈھاکہ میں کھیلے جانے والے دوسرے کرکٹ ٹیسٹ میچ میں بنگلہ دیش نے انگلینڈ کو 108 رنز سے شکست دے دی ہے۔

اس فتح کے نتیجے میں میزبان ٹیم نے یہ ٹیسٹ سیریز ایک ایک سے برابر کر دی ہے۔

٭ تازہ سکور جاننے کے لیے کلک کریں

اتوار کو ٹیسٹ میچ کے تیسرے دن بنگلہ دیش نے انگلینڈ کو جیتنے کے لیے 273 رنز کا ہدف دیا لیکن انگلش ٹیم صرف 164 رنز بنا کر آؤٹ ہو گئی۔

انگلینڈ کے اوپنرز الیسٹر کک اور ڈکِٹ نے نصف سنچریاں بناتے ہوئے ٹیم کو 100 رنز کا آغاز دیا تاہم اس کے بعد بقیہ نو کھلاڑی سکور میں صرف 64 رنز کا اضافہ ہی کر سکے۔

کک 59 اور ڈکٹ 56 رنز بنانے کے بعد آؤٹ ہوئے۔ بقیہ بلے بازوں میں سے سٹوکس کے علاوہ کسی کا سکور دوہرے ہندسوں میں نہیں پہنچ سکا۔

بنگلہ دیش کی فتح میں اہم کردار نوجوان سپنر مہدی حسن نے ادا کیا جنھوں نے 77 رنز کے عوض چھ وکٹیں لیں۔ انھوں نے اس میچ میں کل 12 وکٹیں حاصل کیں۔

ان کے علاوہ شکیب الحسن نے چار کھلاڑیوں کو پویلین کی راہ دکھلائی جن میں سے تین وکٹیں انھوں نے ایک ہی اوور میں لیں۔

تصویر کے کاپی رائٹ Reuters
Image caption انگلینڈ کے کپتان الیسٹر کک نے نصف سنچری سکور کی لیکن اپنی ٹیم کو شکست سے نہ بچا سکے

اس سے قبل بنگلہ دیش کی پوری ٹیم کھانے کے وقفے کے فوراً بعد 296 رنز بنا کر آؤٹ ہو گئی۔

بنگلہ دیش کی جانب سے امرالقیس نے سب سے زیادہ 78 رنز بنائے جبکہ محمود اللہ نے 47 اور شکیب الحسن نے 41 رنز بنائے۔

پہلی اننگز میں سنچری بنانے والے تمیم اقبال نے انگلینڈ کے خلاف اپنی بہتر کارکردگی جاری رکھتے ہوئے 40 رنز بنائے۔

انگلینڈ کی جانب سے دوسری اننگز میں عادل رشید نے چار جبکہ بین سٹوکس نے تین کھلاڑیوں کو آؤٹ کیا۔

میچ کے پہلے دن بنگلہ دیش نے ٹاس جیت کر پہلے بیٹنگ کا فیصلہ کیا لیکن پوری ٹیم صرف 220 رنز بناکر آؤٹ ہو گئی تھی۔

انگلینڈ نے اپنی پہلی اننگز میں جو روٹ کی نصف سنچری 56 رنزاور ووکس کے 46 اور عادل راشد کے 44 رنز کی بدولت 244 رنز بنائے اور 24 رنز کی معمولی سبقت حاصل کی تھی۔