آل راؤنڈر محمد حفیظ کی ون ڈے ٹیم میں واپسی

حفیظ تصویر کے کاپی رائٹ AFP
Image caption محمد حفیظ گذشتہ سال صرف پانچ ایک روزہ میچ کھیل سکے تھے

پاکستانی آل راؤنڈر محمد حفیظ کو آسٹریلیا کے خلاف پانچ ایک روزہ میچوں کی سیریز کے لیے ٹیم میں شامل کر لیا گیا ہے۔

سنیچر کو پاکستان کرکٹ بورڈ کی طرف سے جاری کردہ پیغام میں بتایا گیا ہے کہ انضمام الحق کی سربراہی میں سلیکشن کمیٹی کو ایک روزہ ٹیم کے کپتان اور کوچ مکی آرتھر کی جانب سے دورہ آسٹریلیا میں ایک روزہ میچوں کے لیے محمد حفیظ کو ٹیم میں شامل کرنے کی درخواست کی گئی۔

سلیکشن کمیٹی نے ٹیم مینجمنٹ کی اس درخواست کو قبول کرتے ہوئے محمد حفیظ کو 16 رکنی سکواڈ میں شامل کر لیا ہے اور بی سی پی کے چیئرمین نے بھی اس کی منظوری دے دی ہے۔

خیال رہے کہ محمد حفیظ گذشتہ سال صرف پانچ ایک روزہ میچ کھیل سکے تھے۔

سنہ 2016 میں انھوں نے جنوری میں دورہ نیوزی لینڈ کے دوران دو میچ کھیلے اور اگست میں انگلینڈ کے دورے میں تین ایک روزہ میچوں میں پاکستان کی نمائندگی کی تھی۔

دورہ انگلینڈ کے بعد سے محمد حفیظ ٹیم سے باہر تھے۔

گذشتہ سال انھیں ویسٹ انڈیز کے خلاف شارجہ میں کھیلے گئے سہ روزہ میچ میں موقع دیا گیا تھا لیکن وہ دونوں اننگز میں قابل ذکر سکور نہ کرسکے۔

واضح رہے کہ گذشتہ سال نومبر میں محمد حفیظ کے بولنگ ایکشن کو کلیئر قرار دے دیا گیا تھا اور اب وہ دوبارہ بین الاقوامی کرکٹ میں بولنگ کرسکیں گے۔

آسٹریلیا کے خلاف پاکستان کا ایک روزہ سکواڈ ان کھلاڑیوں پر مشتمل ہے: اظہرعلی (کپتان)، شرجیل خان، بابراعظم، شعیب ملک، اسد شفیق، عمراکمل، سرفراز احمد۔، محمد رضوان، عماد وسیم، محمد نواز، وہاب ریاض، محمد عامر، حسن علی، محمد عرفان، راحت علی اور محمد حفیظ

پاکستان اور آسٹریلیا کے درمیان پانچ ایک روزہ کرکٹ میچوں کی سیریز کا پہلا میچ 13 جنوری کو برسبن میں کھیلا جائے گا۔

متعلقہ عنوانات

اسی بارے میں