پی ایس ایل: لاہور قلندرز نے دفاعی چیمپیئن اسلام آباد یونائٹیڈ کو چھ وکٹوں سے ہرا دیا

کرکٹ تصویر کے کاپی رائٹ PSL
Image caption جیسن رائے اور سنیل نارائن نے تین اوورز میں 34 رنز کی شراکت قائم کی اور لاہور قلندرز کو آسان فتح دلا دی

دبئی میں جاری پاکستان سپر لیگ سیزن ٹو میں آج کے پہلے میچ میں دفاعی چیمپیئن اسلام آباد یونائٹیڈ کو لاہور قلندرز کے ہاتھوں چھ وکٹوں سے شکست ہو گئی۔

دونں ٹیموں کے ٹاپ سکوررز میں صرف ایک رن کا فرق تھا لیکن اصل فرق تھا کہ اسلام آباد یونائٹیڈ کے کپتان مصباح الحق کوپارٹنرشپ کے لیے کوئی ساتھی نہ مل سکا۔

دوسری جانب لاہور قلندرز کے جیسن رائے نے پہلے کپتان برینڈن میککلم، پھر عمل اکمر اور آخر میں سنیل نارائن کے ساتھ مختلف شراکت داریاں قائم کیں اور ان کی مدد سے لاہور کو ایک آسان فتح میسر آئی۔

’بک میکرز سے رابطہ‘: شرجیل خان اور خالد لطیف معطل

سنسنی خیز مقابلے کے بعد اسلام آباد یونائیٹڈ کی فتح

سخت مقابلے کے بعد کوئٹہ گلیڈی ایٹرز فاتح

جیسن رائے ایک چھکے اور چھ چوکوں کی مدد سے 60 رنز بنا کر ناٹ آؤٹ گئے جبکہ ان کے ساتھی بلے باز سنیل نارائن نے صرف 12 گیندوں پر 26 رنز بنائے اور وننگ شاٹ بھی کھیلا۔

159 رنز کے تعاقب میں قلندز نے اسی طرح تیزی سے بیٹنگ شروع کی جیسی انھوں نے کوئٹہ گلیڈی ایٹرز کے خلاف کی تھی لیکن اس دفعہ دو وکٹیں گرنے کے بعد وہ پریشان نہیں ہوئے اور اطمینان سے اسلام آباد یونائٹیڈ کی بولنگ کا سامنا کیا جو کہ محمد عرفان کے نہ ہونے سے کچھ کمزور تھی۔

اس سے پہلے کپتان مصباح الحق کی شاندار بیٹنگ کے مدد سے اسلام آباد یونائٹیڈ 7 وکٹوں کے نقصان پر 158 رنز بنانے میں کامیاب ہوئی۔

73 رنز کے اچھے آغاز کے باوجود یونائٹیڈ کے بقیہ کھلاڑی خاطر خواہ کھیل نہ پیش کر سکے اور گرانٹ ایلیٹ کو اپنی وکٹوں گنواتے گئے۔

قلندرز کے ایلیٹ نے چار اووروں میں 23 رنز کے عوض چار وکٹیں حاصل کیں۔

تصویر کے کاپی رائٹ PSL
Image caption کپتان مصباح کی نصف سنچری کی مدد سے اسلام آباد یونائٹیڈ نے 158 رنز بنائے

لیکن کپتان مصباح ہمیشہ کی طرح ڈٹے رہے اور 61 رنز ناٹ آؤٹ بنائے جس میں پانچ بلند و بالا چھکے اور تین چوکے شامل تھے۔

ان کے علاوہ صرف اوپنرز ڈیوائن سمتھ اور سیم بلنگز ڈبل فگرز کے ہندسے میں داخل ہوئے۔

ٹورنامنٹ میں یہ لاہور قلندرز کی پہلی فتح ہے جبکہ اسلام آباد کی ٹیم ایک میچ جیت چکی ہے۔

یاد رہے کہ کل جمعے کو ان کی ٹیم کے دو کھلاڑی شرجیل خان اور خالد لطیف کو مبینہ طور پر بک میکرز سے رابطے کے بعد ٹورنامنٹ سے معطل کر دیا گیا تھا جبکہ محمد عرفان سے تفتیش جاری ہے۔

لاہور قلندرز نے کل اپنے پہلے میچ میں کوئٹہ گلیڈی ایٹرز کو سخت مقابلہ دیا لیکن آٹھ رنز سے ان کو شکست ہو گئی۔

آج کھیلے جانے والے دوسرے میچ میں کراچی کنگز کا مقابلہ کوئٹہ گلیڈی ایٹرز سے ہو گا۔

متعلقہ عنوانات

اسی بارے میں