کوئٹہ گلیڈی ایٹرنے کراچی کنگز کو چھ وکٹ سے شکست دے کر اپنی پہلی پوزیشن مستحکم کر لی

کرکٹ تصویر کے کاپی رائٹ PSL
Image caption احمد شہزاد اور اسد شفیق نے پہلی وکٹ کے لیے سو رنز کی شراکت قائم کر کہ کوئٹہ گلییڈی ایٹرزکو فتح کی جانب گامزن کر دیا

متحدہ عرب امارات کے دبئی انٹرنیشنل سٹیڈیم میں پاکستان سپر لیگ سیزن ٹو میں جمعرات کو کھیلے جانے والے واحد میچ میں کراچی کنگز کو کوئٹہ گلیڈی ایٹر کے ہاتھوں چھ وکٹوں سے شکست ہو گئی ہے۔

کوئٹہ گلیڈی ایٹر نے انیسویں اوور میں کراچی کنگز کے خلاف ایک آسان فتح مکمل کر کے نو پوائنٹس کے ساتھ اپنی پہلی پوزیشن مستحکم کر لی ہے۔

’لالہ سیلفی نہیں لینے دیں گے‘

’پاکستان سپر لیگ کا فائنل لاہور میں ہی ہو گا‘

کپتان سرفراز احمد نے محمد عامر کے گیند پر میچ وننگ شاٹ کھیلا اور 19 رنز بنا کر ناٹ آؤٹ گئے جبکہ ان کے ساتھ محمود اللہ آٹھ رنز پر موجود تھے۔

رائلی روسو میچ کے اختتام تک وکٹ پر نہیں رہ سکے اور اسامہ میر کی گیند پر 15 رنز کر کہ آؤٹ ہوگئے۔

احمد شہزاد اور اسد شفیق نے کوئٹہ گلیڈی ایٹر کے لیے شاندار کرکردگی دکھاتے ہوئے پہلی وکٹ کی شراکت میں 105 رنز سکور کیے تھے جب احمد شہزاد کو سہیل خان نے 54 رنز پر آؤٹ کر کے کراچی کے لیے پہلے کامیابی حاصل کی۔

اسی اوور میں کوئٹہ گلیڈی ایٹر کو اگلا نقصان اٹھانا پڑا جب کیون پیٹرسن صفر پر رن آؤٹ ہو گئے اور آخری گیند پر اسد شفیق بھی کیچ دے بیٹھے۔

اس سے پہلے کراچی کنگز نے 20 اوورز کے اختتام تک پانچ وکٹوں کے نقصان پر 154 رنز بنائے۔

کراچی کنگز نے دس اوورز میں 69 رنز بنائے تھے لیکن بابر اعظم کے آؤٹ ہونے کے بعد کرس گیل کی سست بیٹنگ سے ٹیم دباؤ میں آگئی۔

تصویر کے کاپی رائٹ PSL
Image caption بابر اعظم نے کپتان کمار سنگاکارا کے ساتھ مل کر ایک بار پھر اچھی شراکت قائم کی

انھوں نے بمشکل 34 گیندوں پر دو چھکوں کی مدد سے 29 رنز سکور کیے۔ دوسری جانب ان کے ساتھ موجود کیئرون پولارڈ نے آغاز آہستہ کیا تھا لیکن آخری اوور میں تیز کھیل کر وہ 19 گیندوں پر 31 رنز بنا کر آؤٹ ہو گئے۔

روی بوپارا بھی اس میچ میں ایک رن سے آگے نہیں بڑھ سکے۔

شعیب ملک اس میچ میں کراچی کے لیے کوئی کارنامہ نہ دکھا سکے اور 9 رنز کر کے آؤٹ ہو گئے۔

آٹھویں اوور میں محموداللہ نے کراچی کنگز کے کپتان کمار سنگاکارا کی 28 رنز پر قیمتی وکٹ حاصل کرکے 63 رنز کی اوپننگ شراکت ختم کی۔

کرچجی کنگز کی اس جوڑی نے پچھلے میچ میں بھی 72 رنز کی شراکت قائم کی تھی اور سنگاکارا اس میں بھی 28 رنز پر آؤٹ ہوئے تھے۔

آج کے میچ کے بعد ان دونوں ٹیموں نے چھ چھ میچز کھیل لیے ہیں۔ کوئٹہ بدستور اول پوزیشن پر جبکہ کراچی آخری پوزیشن پر موجود ہے۔

ٹورنامنٹ میں کل دو میچ کھیلے جائینگے جس میں پاکستان کے مقامی وقت کے مطابق ساڑھے چار بجے پہلے لاہور قلندرز کا مقابلہ پشاور زلمی سے ہو گا جبکہ رات نو بجے اسلام آباد یونایئٹڈ کا سامنا کوئٹہ گلیڈی ایٹرز سے ہوگا۔

متعلقہ عنوانات

اسی بارے میں