بنگلور ٹیسٹ میں آسٹریلیا کو 48 رنز کی برتری

کرکٹ تصویر کے کاپی رائٹ Reuters

بنگلور میں انڈیا اور آسٹریلیا کے درمیان کھیلے جانے والے دوسرے ٹیسٹ میچ کے دوسرے دن مہمان ٹیم نے اپنی پہلی اننگز میں 48 رنز کی برتری حاصل کر لی ہے جبکہ اس کی چار وکٹیں ابھی باقی ہیں۔

اتوار کو جب دوسرے دن کے کھیل کا اختتام ہوا تو آسٹریلیا نے اپنی پہلی اننگز میں چھ وکٹوں کے نقصان پر 237 رنز بنائے تھے۔

آسٹریلوی اننگز میں اب تک سب سے کامیاب بلے باز میٹ رینشا اور شان مارش رہے ہیں جنھوں نے بالترتیب 60 اور 66 رنز کی اننگز کھیلی ہے۔

میچ کا تفصیلی سکور کارڈ

پہلے اوکیف اور اب لیون، انڈیا 189 رنز پر ڈھیر

انڈیا کے 189 رنز کے جواب میں ڈیوڈ وارنر اور میٹ رینشا نے آسٹریلوی اننگز کا 40 رنز سے دوبارہ آغاز کیا تو 52 کے مجموعی سکور پر ڈیوڈ وارنر 33 رنز بنا کر ایشون کی گیند پر بولڈ ہوگئے۔

پہلے ٹیسٹ میچ میں سنچری سکور کرنے والے سٹیون سمتھ صرف آٹھ رنز بنا سکے جبکہ ہینڈزکومپ نے 16 رنز بنائے۔

انڈیا کی جانب سے رویندرا جدیجا تین وکٹوں کے ساتھ نمایاں بولر رہے ہیں۔ ان کے علاوہ ایشانت شرما، اومیش یادو اور ایشون نے ایک، ایک کھلاڑی کو آؤٹ کیا۔

تصویر کے کاپی رائٹ Reuters

اس سے قبل سنیچر کو بنگلور میں کھیلے جانے والے دوسرے ٹیسٹ میچ کے پہلے دن ایک بار پھر آسٹریلین ٹیم کے سپنرز نے انڈین بلے بازوں کو مشکل میں ڈالے رکھا اور انھیں کریز پر جمنے نہیں دیا۔

پہلے دن انڈیا کی پوری ٹیم پہلے بیٹنگ کرنے کا فیصلہ کرنے کے بعد اپنی پہلی اننگز میں 189 رنز بنا کر آؤٹ ہوگئی تھی۔

آسٹریلیا کی جانب سے ایک بار پھر سپنرز نے عمدہ بولنگ کا مظاہرہ کیا اور سپن بولنگ کو بہتر انداز میں کھیلنے کے لیے مشہور انڈین بلے باز اپنے ہی میدان پر انھیں کھیلنے میں ناکام دکھائی دیے۔

نیتھن لیون نے عمدہ بولنگ کی اور صرف 50 رنز عوض آٹھ وکٹیں حاصل کیں۔ ان کے علاوہ سٹیو اوکیف اور مچل سٹارک نے ایک، ایک کھلاڑی کو آؤٹ کیا۔

متعلقہ عنوانات

اسی بارے میں