انڈیا: رانچی ٹیسٹ بغیر جیت ہار کے ختم

تصویر کے کاپی رائٹ AP
Image caption انڈیا کے سپن گيند باز اجے جڈیجہ نے دوسری اننگز میں چار کھلاڑیوں کو آؤٹ کیا

آسٹریلیا اور انڈیا کے درمیان چار کرکٹ ٹیسٹ میچوں کی سیریز کے تحت رانچي میں کھیلے جانے والا تیسرا میچ ہار جیت کے بغیر ختم ہوگيا ہے۔

میچ کے پانچویں روز جب کھیل ختم ہوا تو آ‎‎سٹریلیا نے اپنی دوسری اننگز میں چھ وکٹوں کے نقصان پر 204 رنز سکور کیے تھے۔

اس میچ میں آسٹریلیا نے ٹاس جیت کے پہلے بلے بازی کرتے ہوئے اپنی پہلی اننگز میں پوری ٹیم 451 رنز بنا کر آؤٹ ہوگئی تھی۔ آسٹریلیا کی پہلی اننگز کی خاص بات کپتان سمتھ کے 176 اور گلین میکسویل کی پہلی سنچری تھی۔

تفصیلی سکورکارڈ

اس کے جواب میں میزبان ٹیم انڈیا نے اپنی پہلی اننگز میں چتیشور پجارا کی ڈبل سنچری اور وکٹ کیپر بیٹسمین وردھیمان ساہا کی سنچری کی بدولت نو وکٹوں کے نقصان پر 609 رنز بنائے تھے اور اننگز کے خاتمے کا اعلان کردیا تھا۔

پجارا نے 202 رنز جبکہ ساہا نے 117 رنز کی شاندار اننگز کھیلی تھیں۔

تصویر کے کاپی رائٹ Reuters
Image caption انڈيا کی طرف سے چتیشور پجارا نے ڈبل سنچری سکور کی

انڈیا کو اس میچ میں 153 رنز کی اہم سبقت حاصل ہوئی تھی۔ چونکہ چوتھے دن کے کھیل کے اختتام پر آسٹریلیا نے اپنی دوسری اننگز میں 23 رنز پر دو وکٹیں گنوا دی تھیں اس لیے اسے شدید مشکلات کا سامنا تھا۔

لیکن آخری دن بلے باز شان مارش اور ہینڈزکومب محتاط بیٹنگ کا مظاہرہ کرتے ہوئے میچ کو ڈرا کرنے میں کامیاب ہوگئے۔ دونوں کھلاڑیوں نے بالترتیب 53 اور 72 رنز سکور کیے۔ ہینڈزکومب آخر تک آؤٹ نہیں ہوئے۔

انڈیا کے سپن گيند باز اجے جڈیجہ نے چار کھلاڑیوں کو آؤٹ کیا۔

واضح رہے کہ دونوں ٹیموں کے درمیان جاری چار ٹیسٹ میچوں کی سیریز ایک، ایک سے برابر ہے۔

پونے میں کھیلے جانے والے پہلے کرکٹ ٹیسٹ میچ میں آسٹریلیا نے انڈیا کو 333 رنز کے بڑے مارجن سے شکست دی تھی جبکہ بنگلور ٹیسٹ میں انڈیا نے 75 رنز سے فتح حاصل کر کے سیریز ایک،ایک سے برابر کر دی تھی۔

چوتھا اور سیریز کا آخری میچ 25 سے 29 مارچ کے درمیان موہالی میں کھیلا جائےگا۔

متعلقہ عنوانات

اسی بارے میں