پاکستان نے آخری میچ اور سیریز جیت لی

تصویر کے کاپی رائٹ AFP

پورٹ آف سپین کے میدان پر کھیلے جانے والے چوتھے اور آخری ٹی ٹوئنٹی میچ میں پاکستان نے ویسٹ انڈیز کو سات وکٹوں سے شکست دے کر سیریز اپنے نام کر لی ہے۔

پاکستان نے 125 رنز کا ہدف 19 اووروں میں تین وکٹوں کے نقصان پر حاصل کیا۔

نوجوان بولر شاداب خان کو دس وکٹیں لینے پر سیریز کا بہترین کھلاڑی قرار دیا گیا۔

میچ کا تفصیلی سکور کارڈ

تیسرے ٹی ٹوئنٹی میچ میں پاکستان کو شکست

احمد شہزاد اور بابر اعظم نے پاکستان کی جانب سے عمدہ بلے بازی کرتے ہوئے دوسری وکٹ کی شراکت میں اہم 70 رنز بنائے۔

پاکستانی ٹی ٹوئنٹی ٹیم میں واپسی کرنے والے اوپنر احمد شہزاد نے آخری میچ میں نصف سنچری سکور کی جبکہ بابر اعظم نے 38 رنز کی اننگز کھیلی۔

کامران اکمل 20 رنز بنانے میں کامیاب ہو سکے۔

اس سے قبل ویسٹ انڈیز نے پہلے بیٹنگ کرتے ہوئے مقررہ 20 اوورز میں آٹھ وکٹوں کے نقصان پر 124 رنز بنائے تھے۔

تصویر کے کاپی رائٹ AFP

پاکستان کی جانب سے اس میچ میں تمام ہی بولرز نے ایک بار پھر عمدہ بولنگ کا مظاہر کرتے ہوئے ویسٹ انڈیز کو بڑا سکور کرنے سے روکے رکھا۔

پاکستان کی جانب سے شاداب خان اور حسن علی نے دو دو وکٹیں حاصل کی ہیں جبکہ عماد وسیم، وہاب ریاض اور رومان رئیس نے ایک، ایک کھلاڑی کو آؤٹ کیا۔

اس سے قبل پاکستان نے ٹاس جیت کر ویسٹ انڈیز کو پہلے بیٹنگ کی دعوت دی تو تیسرے ٹی ٹوئنٹی میچ میں عمدہ بلے بازی کرنے والے ایون لیوس صرف سات رنز بنا کر آؤٹ ہوگئے۔

بعد میں چاڈوک والٹن نے اچھی بلے بازی کرتے ہوئے سب سے زیادہ 40 رنز بنائے۔ ان کے علاوہ کپتان بریتھویٹ نے 37 رنز کی اننگز کھیلی۔

ٹی ٹوئنٹی سیریز کے اختتام کے بعد سات اپریل سے دونوں ٹیمیں تین ایک روزہ میچ کھیلیں گی جس کے بعد 22 اپریل سے تین ٹیسٹ میچوں کی سیریز کا آغاز ہوگا۔

اسی بارے میں