’ڈی ویلیئرز انڈین ہوتے تو ان کے نام پر مندر ہوتے‘

ڈی ولیئرز تصویر کے کاپی رائٹ Getty Images
Image caption ڈی ویلیئرز اس سیزن کا اپنا پہلا میچ کھیل رہے تھے

جنوبی افریقہ سے تعلق رکھنے والے معروف بلے باز اے بی ڈی ویلیئرز کی کنگز الیون پنجاب کے خلاف اننگز رائل چیلنجرز بنگلور کو میچ تو نہیں جتوا سکی لیکن انھوں نے سوشل میڈیا پر شائقین کا دل ضرور جیت لیا ہے۔

انڈین پریمیئر لیگ کے دسویں سیزن کے دوران پیر کو کنگز الیون پنجاب اور رائل چیلنجرز بنگلور کے درمیان کھیلے گئے میچ میں اے بی ڈی ویلیئرز نے 46 گیندوں پر نو چھکوں کی مدد سے 89 رنز کی ناقابل شکست اننگز کھیلی تھی۔

ان کی اس اننگز کے بعد سماجی رابطوں کی ویب سائٹس پر بعض شائقین کا کہنا تھا کہ وہ صرف اے بی ڈی ویلیئرز کی وجہ سے ہی آئی پی ایل دیکھتے ہیں جبکہ بعض کا کہنا تھا کہ ’ڈی ویلیئرز کسی دوسرے سیارے سے آئے ہیں۔‘

ایک صارف نے انڈیا کے کرکٹ فینز کی عقیدت اور ڈی ویلیئرز کی صلاحیت کے متعلق لکھا ’ڈی ویلیئرز اگر انڈین ہوتے تو ان کے نام پر مندر بن جاتے، لوگ ان کی پوجا کرنے لگتے۔‘

ڈی ویلیئرز کے علاوہ ان کی ٹیم کے باقی بیٹسمین 74 گیندوں پر محض 55 رنز ہی بنا سکے۔

تصویر کے کاپی رائٹ Twitter
Image caption لال دائرے میں سفید نقطے کو دکھایا گیا ہے اور کہا گیا ہے کہ یہ چاند نہیں ڈی ولیئرز کا چھکا ہے

ٹی وی اینکر @gauravkapur لکھتے ہیں: 'یہ شخص کچھ اور ہی ہے۔'

@SirJadeja کے اکاؤنٹ سے ایک تصویر پوسٹ کی گئی اور لکھا گیا: 'یہ چاند نہیں ہے۔ یہ ڈی ویلیئرز کا چھکا ہے جو چاند پر گیا۔'

rajatgarg123@ نے ڈی ویلیئرز کے بارے میں لکھا: 'انڈیا کے سارے بیٹسمین اوور ریٹیڈ ہیں، اصل بیٹسمین تو یہ ہے۔'

ٹوئٹر ہینڈل aagamgshah@ نے لکھا: 'بیٹنگ ٹیلنٹ میں اگر دھونی بچے ہیں تو کوہلی جواں مرد ہیں اور ڈی ویلیئرز لیجنڈ ہیں۔'

تصویر کے کاپی رائٹ Reuters
Image caption ڈی ولیئرز اپنے مخصوص جارحانہ انداز کے لیے معروف ہیں

کنگز الیون پنجاب اور رائل چیلنجرز بنگلور کے درمیان اس میچ کی خاصیت یہ رہی کہ کم سکورنگ میچ کے باوجود اس میں کل 20 چھکے لگے۔

خیال رہے کہ یہ اے بی ڈی ویلیئرز کا اس سیزن میں پہلا میچ تھا اور انھیں کرس گیل کی جگہ ٹیم میں شامل کیا گیا تھا۔

سرکاسٹک ڈیوڈ کے نام سے ایک صارف نے ٹوئٹر پر لکھا: 'اگر یہ کھیل انفرادی طور پر کھیلا جاتا تو ڈی ویلیئرز اسے 20-25 رنز کے فرق سے جیت لیتے۔'

متعلقہ عنوانات

اسی بارے میں