پاکستان نے ٹی ٹوئنٹی کے بعد ون ڈے سیریز بھی جیت لی

کرکٹ تصویر کے کاپی رائٹ AFP
Image caption پاکستان نے ایک روزہ میچوں کی سیریز میں دو ایک سے کامیابی حاصل کی

گیانا میں کھیلے گئے تیسرے اور آخری ایک روزہ میچ میں پاکستان نے میزبان ویسٹ انڈیز کو چار وکٹوں سے شکست دے کر سیریز دو ایک سے اپنے نام کر لی ہے۔

پاکستان کی اس جیت میں محمد حفیظ اور شعیب ملک نے اہم کردار ادا کیا اور تجربے کا بھرپور فائدہ اٹھاتے ہوئے اپنی ٹیم کو 234 رنز کا ہدف حاصل کرنے میں مدد فراہم کی۔

شعیب ملک نے ناقابل شکست 101 اور محمد حفیظ نے 81 رنز کی اننگز کھیلی۔ دونوں بلے بازوں نے چوتھی وکٹ کی شراکت میں 113 رنز بنائے۔

میچ کا تفصیلی سکور کارڈ

تیسرے ون ڈے میچ کی تصاویر

کیا پاکستان 26 سالہ ریکارڈ قائم رکھ سکے گا؟

اس سے قبل ویسٹ انڈیز کی ٹیم نے پہلے بیٹنگ کرتے ہوئے مقررہ 50 اوورز میں نو وکٹوں کے نقصان پر 233 رنز بنائے تھے۔

تصویر کے کاپی رائٹ AFP
Image caption شعیب ملک نے عمدہ کھیل کا مظاہرہ کیا

میزبان ٹیم کی جانب سے ہوپ نے 71 اور جیسن محمد 59 رنز کے ساتھ نمایاں بلے باز رہے۔

پاکستان کی طرف سے جنید خان، محمد عامر اور شاداب خان نے دو، دو جبکہ حسن علی اور عماد وسیم نے ایک، ایک وکٹ حاصل کی۔

ہدف کے تعاقب میں پاکستانی بلے بازوں کا آغاز اچھا نہ تھا اور اننگز کی پہلی گیند پر کامران اکمل گیبریئل کی گیند پر کیچ آؤٹ ہوگئے۔

ان کے بعد احمد شہزاد تین اور گذشتہ میچ میں سنچری سکور کرنے والے بابر اعظم صرف 16 رنز بنانے کے بعد پویلین لوٹ گئے تو محمد حفیظ اور شعیب ملک نے محتاط انداز میں پاکستان اننگز کو آگے بڑھانا شروع کیا۔

شعیب ملک نے دس چوکوں اور دو چھکوں کی مدد سے سنچری مکمل کی جبکہ محمد حفیظ کی نصف سنچری میں آٹھ چوکے اور دو چھکے شامل رہے۔

تصویر کے کاپی رائٹ AFP
Image caption جنید خان، محمد عامر اور شاداب خان نے دو، دو وکٹیں حاصل کیں

محمد حفیظ کے آؤٹ ہونے کے بعد کپتان سرفراز احمد کریز پر آئے جنھوں نے شعیب ملک کے ساتھ مل کر پانچویں وکٹ کی شراکت میں 87 رنز بنائے اور اپنی ٹیم کو یہ میچ اور سیریز جتوائی۔ سرفراز احمد نے ناٹ آؤٹ 24 رنز سکور کیے۔

تصویر کے کاپی رائٹ AFP
Image caption تین ایک روزہ میچوں کی سیریز ایک، ایک سے برابر ہے

خیال رہے کہ اس سے قبل کھیلے گئے دو ایک روزہ میچوں میں سے پہلا ویسٹ انڈیز جبکہ دوسرا پاکستان نے جیتا تھا۔

دونوں ٹیمیں اب تین ٹیسٹ میچوں کے سیریز میں آمنے سامنے ہوں گی۔ ٹیسٹ سیریز کا آغاز 21 اپریل سے کنگسٹن میں کھیلے جانے والے پہلے ٹیسٹ میچ سے ہوگا۔

متعلقہ عنوانات

اسی بارے میں