مطمئن ہوں کہ وہ حاصل کیا جو بڑی ٹیمیں بھی نہ کر سکیں: مصباح الحق

مصباح الحق تصویر کے کاپی رائٹ Getty Images
Image caption مصباح الحق نے کہا ویسٹ انڈیز کے خلاف فتح وہ زندگی بھر یاد رکھیں گے اور اس کا سہرا ٹیم کے تمام کھلاڑیوں کے سر ہے

پاکستانی کرکٹ ٹیم کے سابق کپتان مصباح الحق کا کہنا ہے کہ پاکستان نے ویسٹ انڈیز میں ٹیسٹ سیریز جیت کر ایک ایسا خواب سچ کر دکھایا ہے جو ٹیسٹ کرکٹ کھیلنے والی ساری ٹیمیں دیکھتی ہیں۔

مصباح الحق پاکستانی ٹیم کے دورۂ ویسٹ انڈیز کی تکمیل کے بعد بدھ کو لاہور پہنچے ہیں۔

پاکستان نے ویسٹ انڈیز کی سرزمین پر ٹیسٹ سیریز جیت کر تاریخ رقم کر دی

’اب پرانے دوستوں کے ساتھ وقت گزار سکوں گا‘

'مصباح نے پاکستان کا کیا بگاڑا تھا'

اس دورے میں پاکستان نے پہلی بار ویسٹ انڈیز کو اس کی سرزمین پر ٹیسٹ سیریز میں شکست دی ہے۔

یہ سیریز مصباح الحق کے بین الاقوامی کریئر کی آخری سیریز بھی تھی اور وہ اب ہر قسم کی انٹرنیشنل کرکٹ سے ریٹائر ہو گئے ہیں۔

ایئرپورٹ پر صحافیوں سے بات کرتے ہوئے ان کا کہنا تھا کہ وہ بہت خوش ہیں کہ ان کے کریئر کی آخری سیریز فتح پر تمام ہوئی اور آخری میچ ایک یادگار میچ ثابت ہوا۔

مصباح الحق نے کہا یہ فتح وہ زندگی بھر یاد رکھیں گے اور اس کا سہرا ٹیم کے تمام کھلاڑیوں کے سر ہے۔

ان کا یہ بھی کہنا تھا کہ وہ اپنے کریئر سے کافی حد تک مطمئن ہیں۔ 'جب بھی انسان پیچھے مڑ کر دیکھتا ہے تو سوچتا ہے کہ کیا مزید کر سکتا تھا لیکن مجھے خوشی ہے اور مطمئن ہوں کہ ایسی چیزیں حاصل کیں جو بڑی بڑی ٹیمیں بھی نہ کر سکیں۔'

مصباح کے مطابق ویسٹ انڈیز کے خلاف اس کی سرزمین پر فتح وہ کامیابی ہے جس کے دنیا کی باقی ٹیمیں خواب دیکھتی ہیں۔

متعلقہ عنوانات

اسی بارے میں