یونس کی سنچری، پاکستانی برتری 180 رنز

تصویر کے کاپی رائٹ BBC World Service
Image caption یہ یونس خان کی ٹیسٹ میچوں میں بیسویں سنچری ہے

دبئی میں تیسرے ٹیسٹ میچ کے دوسرے دن یونس خان اور اظہرعلی کی ذمہ دارانہ بیٹنگ کے نتیجے میں پاکستانی ٹیم نے ایک بار پھر انگلش ٹیم کےگردگھیرا تنگ کردیا ہے۔

کھیل کے اختتام پر پاکستان نے دو وکٹوں کے نقصان پر دو سو بائیس رنز بنا لیے۔ پاکستان کو انگلینڈ پر ایک سو اسّی رنز کی برتری حاصل ہے جبکہ اس کی آٹھ وکٹیں باقی ہیں۔

میچ کا تفصیلی سکور کارڈ

دبئی ٹیسٹ کا دوسرا دن: تصاویر

دوسرے دن کی خاص بات پاکستانی بلے بازوں یونس خان اور اظہر علی کی عمدہ بلے بازی تھی۔

یونس خان نے گزشتہ چھ ناکام اننگز کی کسر اپنی بیسویں ٹیسٹ سنچری سے پوری کر دی۔ یہ اس سیریز میں کسی بھی بیٹسمین کی پہلی سنچری بھی ہے۔

کھیل کے اختتام پر وہ ایک سو پندرہ رنز پر کھیل رہے تھے، ان کی اننگز میں ایک چھکا اور گیارہ چوکے شامل تھے۔ اظہر علی اپنی دوسری ٹیسٹ سنچری کی طرف بڑھتے ہوئے ایک چھکے اور تین چوکوں کی مدد سے پچھہتر رنز پر ناٹ آؤٹ تھے۔

دونوں سیریز کی سب سے بڑی پارٹنر شپ میں ایک سو چورانوے رنز کا اضافہ کر چکے ہیں۔

یونس اور اظہر نے ٹیم کو اس وقت سنبھالا جب بیالیس رنز کی انگلینڈ کی برتری کو ختم کرنے سے پہلے ہی دونوں اوپنرز توفیق عمر اور محمد حفیظ آؤٹ ہوچکے تھے۔

توفیق عمر چھ رنز بنا کر اینڈرسن کی گیند پر سلپ میں اسٹراس کے ہاتھوں کیچ ہوئے جبکہ حفیظ کو اکیس رنز پر مونٹی پنیسر نے ایل بی ڈبلیو کیا۔

تصویر کے کاپی رائٹ AFP
Image caption اظہر علی نے ایک مرتبہ پھر ٹیم کے لیے اہم اننگز کھیلی ہے

اس سے پہلے انگلینڈ کی پوری ٹیم پہلی اننگز میں ایک سو اکتالیس رنز بنا کر آؤٹ ہوگئی۔

دوسرے دن انگلینڈ نے ایک سو چار رنز چھ کھلاڑی آؤٹ پر اننگز شروع کی تو پاکستانی بولرز کو بساط لپیٹنے میں بارہ اوورز لگے۔

انگلینڈ کی جانب سے کپتان سٹراس نے پانچ چوکوں کی مدد سے چھپن رنز کی ذمہ دارانہ اننگز کھیلی۔

پاکستان کی جانب سے عبدالرحمن نے چالیس رنز کے عوض پانچ وکٹیں لی جبکہ سعید اجمل نے تین اور عمرگل نے دو کھلاڑیوں کو آؤٹ کیا۔

ابوظہبی ٹیسٹ کی دوسری اننگز میں چھ وکٹوں کے بعد یہ عبدالرحمن کی ٹیسٹ کرکٹ میں دوسری بہترین کارکردگی ہے۔

اس سیریز میں پاکستانی سپنر سعید اجمل بیس اور عبدالرحمن سترہ وکٹیں حاصل کر چکے ہیں۔

پاکستان کی ٹیم دبئی ٹیسٹ میں اپنی پہلی اننگز میں صرف ننانوے رنز بنا کر آؤٹ ہو گئی تھی۔تین ٹیسٹ میچوں پر مشتمل سیریز میں پاکستان کو دو صفر سے فیصلہ کن برتری حاصل ہے۔

اسی بارے میں