ویسٹ انڈیز کو دوسرے ٹیسٹ میں بھی شکست

تصویر کے کاپی رائٹ Other
Image caption انگلش کپتان اینڈریو سٹراس نے عمدہ بلے بازی کا سلسلہ جاری رکھا

انگلینڈ نے دوسرے کرکٹ ٹیسٹ میں ویسٹ انڈیز کو نو وکٹ سے شکست دے کر تین میچوں کی سیریز میں دو صفر کی فیصلہ کن برتری حاصل کر لی ہے۔

نوٹنگھم میں ٹرینٹ برج کے گراؤنڈ پر کھیلے جانے والے میچ کے چوتھے دن ویسٹ انڈیز نے انگلینڈ کو فتح کے لیے ایک سو آٹھ رنز کا ہدف فراہم کیا جو اس نے ایک وکٹ کے نقصان پر حاصل کر لیا۔

میچ کا تفصیلی سکور کارڈ

دوسری اننگز میں انگلش اوپنرز نے ٹیم کو نواسی رنز کا آغاز فراہم کر کے اس آسان ہدف کا حصول مزید آسان بنا دیا۔

اس سے قبل چوتھے دن ویسٹ انڈیز نے اکسٹھ رنز چھ کھلاڑی آؤٹ پر اپنی دوسری اننگز شروع کی تو اس کی پوری ٹیم ایک سو پینسٹھ رنز بنا کر پویلین لوٹ گئی اور اسے انگلینڈ پر ایک سو سات رنز کی برتری ملی۔

پہلی اننگز میں سنچری بنانے والے مارون سیموئلز نے ایک مرتبہ پھر جم کر انگلش بولرز کا مقابلہ کیا اور چھہتر رنز بنا کر ٹاپ سکورر رہے۔ سیموئلز کے علاوہ کوئی بھی بلے باز جم کر نہ کھیل سکا۔

انگلینڈ کی جانب سے دوسری اننگز میں سب سے کامیاب بولر جیمز اینڈرسن اور ٹم بریسنن رہے جنہوں نے چار، چار وکٹیں حاصل کیں۔ بریسنن نے پہلی اننگز میں بھی چار کھلاڑیوں کو آؤٹ کیا تھا۔

اس ٹیسٹ میں ویسٹ انڈیز نے ٹاس جیت کر پہلے کھیلنے کا فیصلہ کیا تھا کپتان سیمی اور سیموئلز کی سنچریوں کی بدولت تین سو ستر رنز بنائے تھے۔ اس کے جواب میں انگلینڈ نے پہلی اننگز میں چار سو اٹھائیس رنز سکور کیے تھے جن میں کپتان سٹراس کے ایک سو اکتالیس رنز سب سے نمایاں تھے۔

ویسٹ انڈیز کی ٹیم: باراتھ، پاول، ایڈورڈز، ڈیرن براوو، چندرپال، سیمیول، رام دین، ڈیرن سیمی، شلنگ ڈن، روچ اور رامپال۔

انگلینڈ کی ٹیم: ایلسٹر کک، اینڈریو سٹراس، جانتھن ٹراٹ، کیون پیٹرسن، بیل، بیر سٹو، پرایور، بریسنن، براڈ، سوان اور اینڈرسن۔

اسی بارے میں