جنوبی افریقہ کی فتح، سیریز برابر

تصویر کے کاپی رائٹ Getty
Image caption آسٹریلوی بلے باز ڈیل سٹین کی تیز بولنگ کے سامنے نہ ٹھہر سکے

پورٹ الزبتھ میں کھیلے جانے والے دوسرے کرکٹ ٹیسٹ میچ میں جنوبی افریقہ نے آسٹریلیا کو 231 رنز سے شکست دے دی ہے۔

کھیل کے چوتھے دن میزبان ٹیم نے آسٹریلیا کو فتح کے لیے 448 رنز کا ہدف دیا لیکن پوری آسٹریلوی ٹیم 216 رنز ہی بنا سکی۔

دوسری اننگز میں آسٹریلوی اوپنرز کرس راجرز اور ڈیوڈ وارنر کے علاوہ کوئی بھی آسٹریلوی بلے باز جم کر نہ کھیل سکا۔

میچ کا تفصیلی سکور کارڈ

ورانر نے 66 رنز بنائے جبکہ راجرز سنچری مکمل کرنے کے بعد 107 رنز بنا کر رن آؤٹ ہو کر پویلین لوٹے۔

ان کے بعد آنے والا کوئی بھی آسٹریلوی بلے باز اپنا انفرادی سکور دوہرے ہندسوں تک نہیں پہنچا سکا اور وقفے وقفے سے وکٹیں گرنے کا سلسلہ جاری رہا۔

جنوبی افریقہ کی جانب سے ڈیل سٹین چار وکٹیں لے کر دوسری اننگز کے سب سے کامیاب بولر رہے ہیں جبکہ فیلینڈر نے دو کھلاڑیوں کو آؤٹ کیا ہے۔

اس سے قبل جنوبی افریقہ نے اتوار کو میچ کے چوتھے دن اپنی دوسری اننگز پانچ وکٹوں کے نقصان پر 270 رنز بنا کر ڈیکلیئر کر دی تھی۔

تصویر کے کاپی رائٹ AP
Image caption کرس راجرز نے سنچری بنائی لیکن دوسرے اینڈ پر ان کا ساتھ دینے کوئی بھی نہ رکا

دوسری اننگز میں جنوبی افریقہ کے لیے سب سے زیادہ رنز ہاشم آملہ نے بنائے۔ انھوں نے 127 رنز کی ناقابلِ شکست اننگز کھیلی۔

اتوار کو جنوبی افریقہ کی دوسری اننگز چار وکٹوں کے نقصام پر 192 رنز سے دوبارہ شروع ہوئی تو ہاشم آملہ نے آغاز میں ہی اپنی سنچری مکمل کر لی۔

اس کے بعد انھوں نے کوئنٹن ڈی کاک کے ساتھ مل کر ٹیم کے سکور میں مزید 39 رنز کا اضافہ کیا۔

اس موقع پر ڈی کاک 34 رنز بنانے کے بعد نیتھن لیون کی گیند پر کیچ ہوگئے۔ ان کی جگہ آنے والے ڈومینی نے 18 رنز ہی بنائے تھے کہ جنوبی افریقی کپتان نے اننگز ختم کرنے کا اعلان کر دیا۔

آسٹریلیا کی جانب سے دوسری اننگز میں سڈل اور جانسن نے دو، دو کھلاڑیوں کو آؤٹ کیا۔

جمعرات کو شروع ہونے والے دوسرے ٹیسٹ میں جنوبی افریقہ نے ٹاس جیت کر پہلے بیٹنگ کرنے کا فیصلہ کیا تھا اور ابراہم ڈی ویلیئرز اور ڈومینی کی شاندار سنچریوں کی بدولت 423 رنز بنائے تھے۔

تین ٹیسٹ میچوں پر مشتمل سیریز اب ایک ایک سے برابر ہوگئی ہے۔

سنچورین میں کھیلے جانے والے پہلے ٹیسٹ میں آسٹریلیا نے جنوبی افریقہ کو 281 رنز سے شکست دی تھی جبکہ پورٹ الزبتھ کا میچ اب جنوبی افریقہ نے جیت لیا ہے۔

اسی بارے میں