سواریز جلد صحت یاب ہو جائیں گے، گلین جانسن

تصویر کے کاپی رائٹ AFP
Image caption لوئس سواریز پانچ میچوں کی پابندی کے باوجود پریمیئر لیگ کے سیزین کے اختتام پر 31 گول کر کے سرفہرست رہے

انگلینڈ کی فٹبال ٹیم کے کھلاڑی گلین جانسن کے مطابق یوراگوائے کے عالمی شہرت یافتہ کھلاڑی لوئس سواریز 19 جون کو یوراگوئے اور انگلینڈ کے درمیان ہونے والے فٹبال کے عالمی کپ میچ سے پہلے صحت یاب ہو جائیں گے۔

گلین جانسن نے بتایا کہ ان کی سواریز سے بات ہوئی ہے اور سواریز کا خیال ہے کہ وہ جلد صحت یاب ہو جائیں گے۔

انھوں نے مزید کہا کہ سواریز بہترین کھلاڑی ہیں اور وہ نہیں چاہتے کہ وہ زخمی ہوں۔

خیال رہے کہ برطانوی کلب لیورپول کی جانب سے کھیلنے والے لوئس سواریز کےگھٹنے میں بدھ کو تربیت کے دوران شدید تکلیف شروع ہو گئی تھی جس کے بعد ان کا آپریشن کرنا پڑا۔

27 سالہ لوئس سواریز کو جن کا گذشتہ جمعرات کو گھٹنے کا آپریشن ہوا، مکمل طور صحت یاب ہونے کے لیے پندرہ دن سے چار ہفتے لگ سکتے ہیں۔

واضح رہے کہ لوئس سواریز پانچ میچوں کی پابندی کے باوجود پریمیئر لیگ کے سیزین کے اختتام پر 31 گول کر کے سرفہرست رہے۔

لوئس سواریز نے اس سال پروفیشنل فٹ بالر ایسوسی ایشن اور فٹ بال رائٹر ایسوسی ایشن کے پلیئر آف دی ایئر کے ایوارڈ بھی حاصل کیے۔

فٹبال کے ماہرین کا خیال ہے کہ اگر سواریز مکمل طور پر فٹ نہ ہوئے تو یہ یوراگوائے ٹیم کا بڑا نقصان ہو گا اور عالمی کپ میں ان کے جیتنے کے امکانات بہت کم ہو جائیں گے۔

جنوبی امریکہ کے ملکوں کے ورلڈ کپ کے کوالیفائنگ راونڈز میں سواریز یوراگوائے کی جانب سے 11 گول کر کے سرفہرست رہے تھے جب کہ ان کی کارکردگی کی بدولت نو ٹیموں میں سے یوراگوائے پانچویں نمبر پر رہی تھی۔

اسی بارے میں