’ہتھکڑیاں پہنا کر گوانتانامو بھیجنے کی کسر رہ گئی ہے‘

تصویر کے کاپی رائٹ AP
Image caption میں ہمیشہ سے تادیبی کارروائی کے حق میں ہوں لیکن ساتھ ہی میرے خیال میں یہ سزا کافی زیادہ ہے: چیلینی

اٹلی کے ڈیفینڈر جورجیو چیلینی نے کہا ہے کہ ان کو دانت کاٹنے پر یوروگوائے کے کھلاڑی سواریز پر چار ماہ کی پابندی بہت زیادہ ہے۔

واضح رہے کہ فٹبال کے عالمی ادارے فیفا نے یوروگوائے کے مشہور کھلاڑی لوئس سواریز کو اطالوی کھلاڑی کو کاٹنے پر 9 انٹرنیشنل میچوں کی پابندی، جرمانے اور چار ماہ تک فٹبال سرگرمیوں سے دور رہنے کی سزا سنائی ہے جو ایک ریکارڈ سزا ہے۔

چیلینی نے کہا ’سواریز کے لیے میرے دل میں انتقام، غصے یا ان کو ملنے والی سزا پر خوشی نہیں ہے۔‘

سواریز کو ملنے والی سزا پر مشہور فٹ بالر میراڈونا کا کہنا ہے کہ یہ سزا نہایت شرمناک ہے۔

انھوں نے ایک ٹی وی شو میں کہا ’فیفا کی جانب سے دی گئی سزا شرمناک ہے اور فیفا کو مداحوں کے جذبات کا کوئی خیال نہیں ہے۔ بس اس بات کی کسر وہ گئی تھی کہ سواریز کو ہتھکڑیاں پہنا دیتے اور گوانتانامو بھیج دیتے۔‘

ٹی وی شو پر میراڈونا نے ٹی شرٹ پہن رکھی تھی جس پر درج تھا ’سواریز ہم تمہارے ساتھ ہیں‘۔

سواریز فیفا ورلڈ کپ چھوڑ کر اپنے ملک واپس چلے گئے ہیں۔ وہ دنت کاٹنے کے الزام کی تردید کرتے ہیں اور کہتے ہیں کہ چیلینی ان سے ٹکرائے تھے۔

تاہم فیفا نے ان کو ملزم قرار دیتے ہوئے ان کی فٹ بال کی تاریخ میں سب سے لمبی سزا سنائی۔

اپنی ذاتی ویب سائٹ پر لکھتے ہوئے چیلینی نے کہا ’میں ہمیشہ سے تادیبی کارروائی کے حق میں ہوں لیکن ساتھ ہی میرے خیال میں یہ سزا کافی زیادہ ہے۔‘

انھوں نے مزید لکھا ’جو کچھ پچ پر ہوا اس کے حوالے سے نہ مجھے غصہ ہے، نہ انتقام کی آگ ہے اور نہ ہی خوشی ہے۔ مجھ میں صرف غصہ اور مایوسی میچ کے حوالے سے ہے۔ اس وقت میں سواریز اور اس کے خاندان کے بارے میں سوچ رہا ہوں جن کے لیے یہ بہت مشکل وقت ہے۔‘

اس سزا کے بعد سواریز کو سپانسر کرنے والی کمپنی 888پوکر نے اپنی سپانسر شپ فوری طور پر منسوخ کردی ہے۔

تاہم دوسری جانب بارسلونا فٹ بال کلب سواریز کو سائن کرنے کے لیے تیار ہیں۔

اسی بارے میں