’جیت تو گئے لیکن عالمی چیمیپئن کی طرح نہیں کھیلے‘

تصویر کے کاپی رائٹ Getty
Image caption جرمنی کی جانب سے تھامس مولر نے دو گول کیے

یورپی فٹبال چیمپیئن شپ کے کوالیفائنگ میچ میں جبرالٹر کے خلاف فتح کے باوجود جرمن کوچ یوآخیم لوو نے کہا ہے کہ ان کی ٹیم عالمی چیمیپئن کی طرح نہیں کھیلی۔

نیورمبرگ میں کھیلے جانے والے ميچ میں جرمنی نے جبرالٹر کو صفر کے مقابلے چار گول سے ہرا دیا تاہم ان کے مینیجر اس نتیجے سے خوش نہیں ہیں۔

انھوں نے کہا: ’میں اس نتیجے سے بالکل مطمئن نہیں ہوں۔ ٹیم نے ہماری منشا کے مطابق کارکردگی پیش نہیں کی۔ ہمیں عالمی چیمپیئن کی طرح کھیلنا چاہیے تھا اور چار گول بہت کم ہیں۔‘

دوسری جانب جبرالٹر کے کوچ ایلن بولا نے اپنی ٹیم کی کارکردگی پر اطمینان کا اظہار کیا ہے۔

واضح رہے کہ جبرالٹر کو یوایفا یورپیئن چیمپیئن شپ میں شامل ہونے والی سب سے نئی ٹیم ہے۔

ایلن بولا نے کہا: ’یہ بہت اچھا نتیجہ ہے۔ ہم اسی طرح کے نتیجے کی امید کرتے تھے۔ ٹیم سے ہم اس زیادہ کی امید نہیں کر سکتے تھے۔‘

تصویر کے کاپی رائٹ Getty
Image caption جرمنی کے مداحوں کو زیادہ گول کی توقع تھی جیسا کہ اس تصویر سے ظاہر ہے

نیورمبرگ میں کھیلے جانے والے ميچ میں جرمنی کی جانب سے ٹامس مولر نے دو گول کیے جبکہ ماریو گوٹزے نے ایک اور جبرالٹر کے یوگن سینٹوز نے خود سے ہی ایک گول کر لیا۔

جرمنی اس جیت کے ساتھ سکالینڈ اور آئیر لینڈ کے ساتھ دوسری پوزیشن پر آگیا ہے جبکہ پولینڈ نے جارجیا کے خلاف چار صرف کی جیت سے پہلی پوزیشن برقرار رکھی ہے۔

اس سے قبل جرمنی ایک میچ ہا گیا تھا اور ایک ميچ اس نے برابری پر ختم کیا تھا جبکہ جبرالٹر اپنے چاروں میچ ہار چکا ہے اور اس کے خلاف کل 21 گول کیے گئے ہیں اور وہ کوئی بھی گول کرنے میں کامیاب نہیں ہوا ہے۔

اسی بارے میں