کارڈف ٹیسٹ: آسٹریلیا کو فتح کے لیے 412 رنز کا ہدف

تصویر کے کاپی رائٹ AFP
Image caption بین سٹوکس 42 رنز بنا کر آؤٹ ہوئے

کارڈف میں جاری ایشز ٹیسٹ سیریز کے پہلے میچ میں انگلینڈ نے آسٹریلیا کو فتح کے لیے 412 رنز کا ہدف دیا ہے۔

جمعے کو میچ کے تیسرے دن انگلش ٹیم اپنی دوسری اننگز میں 289 رنز بنا کر آؤٹ ہوگئی اور یوں اسے آسٹریلیا پر 411 رنز کی مجموعی برتری حاصل ہوئی ہے۔

آسٹریلوی ٹیم میچ کے چوتھے دن اپنی دوسری اننگز کا آغاز کرے گی۔

میچ کا تفصیلی سکور کارڈ

اب سے کچھ دیر قبل جوس بٹلر سات، بین سٹوکس 42 اور سٹوورٹ براڈ چار رنز بنا کر آؤٹ ہوئے۔

پہلی اننگز کی طرح دوسری اننگز میں بھی انگلش ٹیم کا آغاز اچھا نہ تھا اور اس کی ابتدائی دو وکٹیں 22 کے مجموعی سکور پر گر گئی تھیں۔

انگلینڈ کی جانب سے پہلی اننگز میں سنچری بنانے والے جو روٹ دوسری اننگز میں 60 رنز بنا کر مچل جانسن کی گیند پر کلین بولڈ ہوئے۔

تصویر کے کاپی رائٹ Getty

اس سے قبل 73 رنز پر تین وکٹیں گرنے کے بعد ایئن بیل اور جو روٹ نے اننگز کو سنبھالا دیا اور چوتھی وکٹ کے لیے 97 رنز کی شراکت قائم کی۔

اس موقع پر مچل جانسن نے نصف سنچری بنانے والے بیل کو 60 کے سکور پر بولڈ کر کے آسٹریلوی ٹیم کو چوتھی کامیابی دلوائی۔

بین سٹوکس نے 42 رنز کی اننگز کھیلی تاہم تین اوورز میں اوپر نیچے تین وکٹیں گرنے سے انگلش ٹیم دباؤ میں آگئی۔

آؤٹ ہونے والے ان انگلش بلے بازوں میں سٹوکس کے علاوہ جوس بٹلر سات اور سٹوارٹ براڈ چار رنز بنا کر پویلیئن لوٹے۔

آخر میں مارک وڈ نے 32 رنز کی اہم اننگز کھیل کر ٹیم کو 289 کے مجموعے تک پہنچے میں مدد دی۔

تصویر کے کاپی رائٹ AFP
Image caption انگلینڈ کے نوجوان فاسٹ بولر مارک وڈ نے عمدہ بولنگ کا مظاہرہ کیا

آسٹریلیا کی جانب سے نیتھن لیون چار وکٹوں کے ساتھ سب سے کامیاب بولر رہے جبکہ مچل سٹارک، جوش ہیزل وڈ اور مچل جانسن نے دو، دو وکٹیں لیں۔

جمعے کو کھیل کے ابتدائی سیشن میں آسٹریلیا کی ٹیم اپنی پہلی اننگز میں 308 رنز بنا کر آؤٹ ہوگئی تھی اور اس طرح انگلینڈ کو آسٹریلیا پر 122 رنز کی برتری ملی۔

آسٹریلیا کے آخری پانچ کھلاڑی تیسرے دن سکور میں صرف 44 رنز کا ہی اضافہ کر سکے۔

انگلینڈ کی جانب سے تمام بولرز نے ہی اچھی بولنگ کی اور جیمز اینڈرسن نے تین جبکہ سٹوارٹ براڈ، معین علی اور مارک وڈ نے دو، دو وکٹیں لی۔

اسی بارے میں