کولمبو میں سری لنکن بلے بازوں کی محتاط مگر پراعتماد بلے بازی

تصویر کے کاپی رائٹ Getty
Image caption کوشال سلوا نے آٹھ چوکوں کی مدد سے نصف سنچری مکمل کی

کولمبو میں کھیلے جانے والے دوسرے کرکٹ ٹیسٹ میچ میں سری لنکا کے بلے بازوں نے بھارت کے 393 رنز کے جواب میں ابتدائی نقصان کے بعد اچھی بلے بازی کی۔

جمعے کو میچ کے دوسرے دن جب کھیل ختم ہوا تو لوہارو تھریمانے اور کپتان اینجلو میتھیوز کریز پر موجود تھے اور سری لنکا نے تین وکٹوں کے نقصان پر 140 رنز بنا لیے تھے۔

میچ کا تفصیلی سکور کارڈ

سری لنکا کو اننگز کے آغاز میں ہی اس وقت نقصان اٹھانا پڑا جب کرونارتنے دوسرے ہی اوور میں امیش یادو کی گیند پر ایل بی ڈبلیو ہوگئے۔

اس کے بعد دوسری وکٹ کے لیے تجربہ کار بلے باز کمارا سنگاکارا اور کوشال سلوا کے درمیان 74 رنز کی شراکت ہوئی۔

سنگاکارا اپنے آخری ٹیسٹ میچ میں 32 رنز کی اننگز کھیل کر آؤٹ ہوئے۔ انھیں ایشون کی گیند پر ریہانے نے کیچ کیا۔

نصف سنچری بنانے والے کوشال سلوا اس اننگز میں امت مشرا کی پہلی اور مجموعی طور پر تیسری وکٹ بنے۔

اس سے قبل بھارت کی پوری ٹیم اپنے گذشتہ روز کے سکور میں مزید 74 رنز کا اضافہ کرنے کے بعد پویلین لوٹ گئی۔

Image caption سنگاکارا اپنے آخری ٹیسٹ میچ میں 32 رنز کی اننگز کھیل کر آؤٹ ہوئے

بھارت کی جانب سے روی چندرن ایشون اور وردھیمان ساہا نے دوسرے دن کے کھیل کا آغاز کیا تاہم مجموعی سکور میں صرف دو رنز کے اضافے کے بعد بھارت کی ساتویں وکٹ اس وقت گری جب ایشون دو رنز بنا کر آؤٹ ہوگئے۔

اس کے بعد ساہا اور امت مشرا نے آٹھویں وکٹ کے لیے 46 رنز کی اہم شراکت قائم کی اور اپنی ٹیم کو ایک اچھے سکور تک پہنچنے میں مدد دی۔

سری لنکا کی جانب سے میتھیوز، پرساد، چمیرا اور ہیراتھ نے دو دو کھلاڑیوں کو آؤٹ کیا۔

پہلے ٹیسٹ میں 63 رنز سے شکستکے بعد اس میچ کے لیے بھارتی ٹیم میں تین تبدیلیاں کی گئی ہیں۔

زخمی شیکھر دھون کے علاوہ ہربھجن سنگھ اور ورون ایرون یہ میچ نہیں کھیل رہے۔ ان کی جگہ مرلی وجے، سٹوئرٹ بنی اور امیش یادو کو بھارتی ٹیم میں شامل کیا گیا ہے۔

تین میچوں کی اس ٹیسٹ سیریز میں سری لنکا کو بھارت پر ایک صفر کی برتری حاصل ہے۔

اسی بارے میں