ناگ پور ٹیسٹ پر بھارت کی گرفت مضبوط

تصویر کے کاپی رائٹ AP
Image caption اس میچ کی پہلی اننگز میں ڈی ویلیئرز بغیر کوئی رن سکور کیے ہی آؤٹ ہوگئے

ناگ پور میں کھیلے جانے والے تیسرے کرکٹ ٹیسٹ میچ کے دوسرے دن کے کھیل کے اختتام پر جنوبی افریقہ نے بھارت کے خلاف دو وکٹوں کے نقصان پر 32 رنز بنا لیے ہیں۔

جنوبی افریقہ کو یہ میچ جیتنے کے لیے مزید 278 رنز کی ضرورت ہے اور دوسری اننگز میں اس کی آٹھ وکٹیں باقی ہیں۔

میچ کا تفصیلی سکور کارڈ

بنگلور ٹیسٹ بارش کی وجہ سے بےنتیجہ

جنوبی افریقہ کی جانب سےڈین ایلگر اور سٹین وین نے دوسری اننگز کا آغاز کیا۔

پہلی اننگز کی طرح جنوبی افریقہ کی دوسری اننگز کا آغاز بھی اچھا نہ تھا اور 17 رنز کے مجموعی سکور پر سٹین وین پانچ رنز بنا کر پویلین لوٹ گئے۔

29 رنز کے مجموعی سکور پر جنوبی افریقہ کی دوسری وکٹ اس وقت گری جب عمران طاہر آٹھ رنز بنا کر آؤٹ ہوئے۔

بھارت کی جانب سے دوسری اننگز میں ایشون اور مشرا نے ایک ایک کھلاڑی کو آؤٹ کیا۔

جمعرات کو کھیل کے دوسرے روز بھی پہلے دن کی طرح بالر چھائے رہے اور جہاں پہلے جنوبی افریقہ کی ٹیم اپنی پہلی اننگز میں صرف 79 رنز بنا کر آؤٹ ہوئی وہیں بھارت کی پوری ٹیم بھی دوسری اننگز میں 173 رنز ہی بنا سکی۔

بھارت کی جانب سے دوسری اننگز میں شیکھر دھون 39 رنز کے ساتھ ٹاپ سکورر رہے جبکہ پجارا نے 31 رنز کی اننگز کھیلی۔

جنوبی افریقہ کے سپنر عمران طاہر نے پانچ جبکہ مورنے مورکل نے تین کھلاڑیوں کو آؤٹ کیا۔

تصویر کے کاپی رائٹ AP
Image caption اشون نے پانچ کھلاڑیوں کو آؤٹ کیا

اس سے قبل جنوبی افریقہ کے بیٹسمین پہلی اننگز میں بھارتی سپنرز کا مقابلہ کرنے میں ناکام رہے اور اس کے آٹھ کھلاڑیوں کا سکور دوہرے ہندسے تک نہ پہنچ سکا۔

جنوبی افریقہ کے لیے سب سے زیادہ 35 رنز جے پی ڈومینی نے بنائے جبکہ ہیمر نے 13 رنز سکور کیے۔

بھارت کی جانب روی چندرن ایشون نے پانچ جبکہ جڈیجا نے چار کھلاڑیوں کو آؤٹ کیا۔

اس سے پہلے بھارت کی پوری ٹیم اپنی پہلی اننگز میں 215 رنز بنا کر آؤٹ ہو گئی تھی۔

چار میچوں کی اس سیریز میں بھارت کو ایک صفر کی برتری حاصل ہے۔

اسی بارے میں