محمد عامر کی قومی ٹیم میں واپسی، ویزے کا انتظار

تصویر کے کاپی رائٹ AFP
Image caption محمد عامر کی کیمپ میں شمولیت پر اظہر علی اور محمد حفیظ نے تحفظات کا اظہار کیا تھا

پاکستانی سلیکٹروں نے نوجوان فاسٹ بولر محمد عامر کو نیوزی لینڈ کا ویزا ملنے کی شرط پر انھیں ون ڈے اور ٹی 20 سکواڈ میں شامل کیا ہے۔

چیف سلیکٹر ہارون رشید نے ٹیم کا اعلان کرتے ہوئے کہا کہ محمد عامر کی سلیکشن کا انحصار انھیں نیوزی لینڈ کا ویزا ملنے پر ہے۔ انھوں نے کہا کہ آئی سی سی کی طرف سے ان پر پابندی اٹھ چکی ہے اور انھیں ان کی حالیہ کارکردگی کی وجہ ٹیم میں شامل کیا جا رہا ہے۔

محمد عامر کو نیوزی لینڈ کا ویزہ ملے گا یا نہیں؟

’محمد عامر دوسرے چانس کے مستحق ہیں‘

محمد عامر نے سپاٹ فکسنگ میں ملوث ہونے کی پاداش میں سزا مکمل ہونے کے بعد ڈومیسٹک کرکٹ اور بنگلہ دیشی پریمیئر لیگ میں بھی حصہ لیا تھا جہاں انھوں نے انتہائی عمدہ کارکردگی کا مظاہرہ کیا۔

پی سی بی حکام نے میڈیا پر گردش کرنے والی ان خبروں کی تردید کر دی ہے جن میں دعویٰ کیا جا رہا ہے کہ محمد عامر کو نیوزی لینڈ کا ویزا مل گیا ہے۔

پی سی بی کے ایک ذمہ دار اہلکار نے نام ظاہر نہ کرنے کی شرط پر بی بی سی کو بتایا کہ ’آج دبئی میں چھٹی ہے، ابھی محمد عامر کے ویزے کی درخواست جمع کرائے دو دن ہوئے ہیں، کچھ اور وقت لگےگا تاہم امید ہے کہ یہ معاملہ احسن طریقے سے حل ہو جائے گا۔‘

اس سے قبل چیف سلیکٹر ہارون رشید نے قومی سکواڈ کا اعلان کرتے ہوئے بتایا تھا کہ محمد عامر کو ویزا ملنے میں مشکلات ہو سکتی ہیں۔

پاکستان کی ون ڈے ٹیم کے کپتان اظہر علی اور سینیئر کھلاڑی محمد حفیظ نے محمد عامر کی قومی ٹیم کے لیے لگائے گئے تربیتی کیمپ میں شمولیت پر تحفظات کا اظہار کرتے ہوئے کیمپ میں شمولیت سے انکار کیا تھا۔ دونوں کھلاڑی پی سی بی کے چیئرمین شہریار خان سے ملاقات کے بعد اپنا موقف تبدیل کر چکے ہیں اور ٹیم کا حصہ ہیں۔

تصویر کے کاپی رائٹ AFP
Image caption عمر گل کو فٹ ہونے کے بعد ٹی ٹوئنٹی سکواڈ میں شامل کیا گیا ہے

پاکستان کو 15 جنوری سے شروع ہونے والے نیوزی لینڈ کے دورے کے دوران تین ایک روزہ اور تین ٹی 20 میچ کھیلنا ہیں۔

ٹی 20 سکواڈ ان کھلاڑیوں پر مشتمل ہے: شاہد آفریدی (کپتان) احمد شہزاد، محمد حفیظ، شعیب ملک، افتخار احمد، محمد رضوان، صہیب مقصود، سرفراز احمد، انور علی، عماد وسیم، وہاب ریاض، عامر یامین، عمر گل، عمر اکمل، محمد عامر، اور سعد نسیم۔

ون ڈے ٹیم: اظہر علی(کپتان)، احمد شہزاد، محمد حفیظ، شعیب ملک، اسد شفیق، بابر اعظم، صہیب مقصود، ظفر گوہر، عماد وسیم، انور علی، وہاب ریاض، راحت علی، محمد عرفان، محمد رضوان، اور محمد عامر۔

اسی بارے میں