پاکستان نے نیوزی لینڈ کو 16 رنز سے شکست دے دی

تصویر کے کاپی رائٹ Getty

آکلینڈ میں کھیلے جانے والے پہلے ٹی 20 انٹرنیشنل میچ میں پاکستان نے نیوزی لینڈ کو 16 رنز سے شکست دے دی ہے۔

پاکستان نے پہلے بیٹنگ کرتے ہوئے مقررہ 20 اوورز میں آٹھ وکٹوں کے نقصان پر 171 رنز سکور کیے۔

جواب میں نیوزی لینڈ کی پوری ٹیم مقررہ 20 اوورز میں 155 رنز بنا کر آؤٹ ہو گئی۔

تفصیلی سکور کارڈ

میچ کی تصاویر

نیوزی لینڈ کی جانب سے ولیئمسن نے عمدہ بیٹنگ کا مظاہرہ کیا اور 59 گیندوں میں 70 رنز سکور کیے۔

نیوزی لینڈ کو دوسرے اوور میں اس وقت نقصان اٹھانا پڑا جب گپٹل رن آؤٹ ہوئے۔ انھوں نے دو رنز بنائے۔

کولن منرو نے 25 گیندوں میں نصف سنچری مکمل کی اور وہاب ریاض کی گیند پر بولڈ ہوئے۔ انھوں نے نصف سنچری وہاب کی گیند پر چھکا مار کر بنائی تھی۔

نیوزی لینڈ کی تیسری وکٹ اس وقت گری جب اینڈرسن کو عماد نے صفر پر اپنی ہی گیند پر کیچ کیا۔

شاہد آفریدی نے پاکستان کو چوتھی کامیابی دلوائی۔ انھوں نے گرانٹ ایلیئٹ کو تین رنز پر بولڈ کیا۔

شاہد آفریدی نے ایک اور وکٹ اس وقت لی جب گرانٹ رونکی بغیر رن بنائے کیچ آؤٹ ہوئے۔

تصویر کے کاپی رائٹ AFP

شاہد آفریدی نے عمر گل کی گیند پر میچل سینٹنر کا شاندار کیچ پکڑا۔ وہ کوئی سکور نہ کر سکے۔

عمر گل کو ایک اور وکٹ اس وقت ملی جب انھوں نے ایسل کو ایک رن پر بولڈ کیا۔

محمد عامر جن کی گیند پر دو کیچ چھٹے نے میٹ ہینری کو آؤٹ کیا۔ ہینری کا کیچ شاہد آفریدی نے پکڑا۔

کین ولیئمسن نے 59 گیندوں میں 70 رنز سکور کیے۔ ان کی وکٹ وہاب ریاض نے لی۔

اس سے قبل پاکستان کو پانچویں اوور میں پہلا نقصان اس وقت اٹھانا پڑا جب احمد شہزاد 13 گیندوں میں 16 رنز بنا کر کیچ آؤٹ ہوئے۔

پاکستان کی دوسری وکٹ ساتویں اوور کی پہلی گیند پر گری جب صہیب مقصود کیچ آؤٹ ہوئے۔ وہ صفر پر آؤٹ ہوئے۔

پاکستان کو تیسرا نقصان اس وقت ہوا جب شعیب ملک 20 رنز بنا کر کیچ آؤٹ ہوئے۔

پاکستان کی چوتھی وکٹ 15 ویں اوور میں گری جب محمد حفیظ 61 رنز بنا کر کیچ آؤٹ ہوئے۔

سترہویں اوور میں عمر اکمل 13 گیندوں میں 24 رنز بنا کر کیچ آؤٹ ہوئے۔

اٹھارہویں اوور کی پہلی گیند پر شاہد آفریدی کیچ آؤٹ ہوئے۔ انھوں نے آٹھ گیندوں میں دو چوکوں اور دو چھکوں کی مدد سے 23 رنز بنائے۔

شاہد آفریدی کے بعد سرفراز احمد دو رنز اور عماد 18 رنز بنا کر آؤٹ ہوئے۔

اسی بارے میں