زمبابوے نے سکاٹ لینڈ کو 11 رنز سے شکست دے دی

تصویر کے کاپی رائٹ Getty
Image caption زمبابوے کے لیے شان ولیمز نے نصف سنچری بنائی

بھارت میں جاری ورلڈ ٹی 20 کرکٹ ٹورنامنٹ کے کوالیفائنگ راؤنڈ کے ایک میچ میں جمعرات کو زمبابوے نے سکاٹ لینڈ کو 11 رنز سے شکست دے دی ہے۔

ناگپور میں کھیلے جانے والے میچ میں 148 رنز کے ہدف کے تعاقب میں سکاٹ لینڈ کی پوری ٹیم آخری اوور کی چوتھی گیند پر 136 رنز بنا کر آؤٹ ہو گئی۔

زمبابوے کی جانب سے ولینگٹن مساکاٹزا نے چار وکٹیں حاصل کیں۔

میچ کا تفصیلی سکور کارڈ

آؤٹ ہونے والے پہلے بلے باز جارج منسے تھے جو پہلے ہی اوور میں دو چوکے لگانے کے بعد سٹمپ ہوگئے۔

اگلے ہی اوور میں چتارا نے کراس کو وکٹوں کے پیچھے کیچ کروا کر زمبابوے کو دوسری کامیابی دلوائی۔

اس میچ میں زمبابوے نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں سات وکٹوں کے نقصان پر 147 رنز بنائے۔

زمبابوے کی جانب سے شان ولیمز کے علاوہ کوئی بھی بلے باز اس میچ میں قابلِ ذکر کارکردگی نہیں دکھا سکا۔

ولیمز نے نصف سنچری بنائی اور 53 رنز کی اننگز کھیلنے کے بعد کیچ آؤٹ ہوئے۔

سکاٹ لینڈ کے لیے سفیان شریف، مارک واٹ اور الیسڈیر ایونز نے دو، دو وکٹیں لیں۔

یہ کوالیفائنگ راؤنڈ میں دونوں ٹیموں کا دوسرا میچ ہے۔

تصویر کے کاپی رائٹ AFP
Image caption سبانڈا صرف چار رنز ہی بنا سکے

زمبابوے نے اپنے پہلے میچ میں ہانگ کانگ کو 14 رنز سے شکست دی تھی جبکہ سکاٹ لینڈ کو افغانستان کے ہاتھوں 14 رنز سے شکست ہوئی تھی۔

خیال رہے کہ تین اپریل تک جاری رہنے والے ورلڈ ٹی 20 مقابلوں میں کل 16 ٹیمیں شریک ہیں جن میں سے آئی سی سی کی عالمی رینکنگ میں ابتدائی آٹھ پوزیشنوں پر براجمان ٹیمیں براہِ راست دوسرے مرحلے میں پہنچ چکی ہیں۔

کوالیفائنگ راؤنڈ میں شریک آٹھ ٹیموں کو دو گروپوں میں تقسیم کیا گیا ہے۔

گروپ اے میں بنگلہ دیش، آئرلینڈ، ہالینڈ اور اپنا پہلا بڑا انٹرنیشنل ٹورنامنٹ کھیلنے والی عمان کی ٹیم شامل ہے۔

دوسرے گروپ میں افغانستان کے ساتھ ہانگ کانگ، سکاٹ لینڈ اور زمبابوے کو رکھا گیا ہے۔

دونوں گروپوں میں سے ایک ایک ٹیم سپر 10 مرحلے کے لیے کوالیفائی کرے گی۔

اسی بارے میں