اومان اور ہالینڈ کے درمیان میچ بارش کی نذر

تصویر کے کاپی رائٹ AFP
Image caption اومان نے اپنے پہلے میچ میں آئرلینڈ کو شکست دی تھی

بھارت میں جاری ورلڈ ٹی 20 کرکٹ ٹورنامنٹ کے کوالیفائنگ راؤنڈ میں جمعے کو ہالینڈ اور اومان کے درمیان کھیلا جانے والا میچ بارش کے باعث منسوخ ہو گیا ہے۔

دھرم شالہ میں کھیلے جانے والے اس میچ میں اومان نے ٹاس جیت کر پہلے ہالینڈ کو بیٹنگ کرنے کی دعوت دی تھی تاہم بارش کی وجہ سے میچ شروع ہی نہیں ہو سکا۔

اس طرح دونوں ٹیموں کو ایک، ایک پوائنٹ مل گیا ہے۔

جس کے بعد گروپ اے میں اومان تین پوائنٹس کے ساتھ پہلے اور بنگلہ دیش دو پوائنٹس کے ساتھ دوسرے نمبر پر آگئی ہے۔

جبکہ ہالینڈ کی ٹیم دو میچوں میں ایک پوائنٹ کے ساتھ تیسرے نمبر پر ہے۔

اومان ورلڈ ٹی 20 کرکٹ ٹورنامنٹ کے کوالیفائنگ راؤنڈ میں ایک کامیابی حاصل کر چکا ہے جب اس نے ایک دلچسپ مقابلے کے بعد آئرلینڈ کو شکست دی تھی۔

دوسری جانب ہالینڈ کو اس کے پہلے میچ میں بنگلہ دیش کے ہاتھوں آٹھ رنز سے شکست کا سامنا کرنا پڑا تھا۔

گروپ بی میں افغانستان پہلے اور زمبابوے دوسرے نمبر پر ہے۔ دونوں ٹیموں نے اپنے ابتدائی دونوں میچ جیت کر چار پوائنٹس حاصل کر رکھے ہیں۔

اس سے قبل جمعرات کو ناگپور میں بھی دو میچز کھیلے گئے تھے۔پہلے میچ میں زمبابوے نے سکاٹ لینڈ کو 11 رنز سے شکست دی تھی۔

ناگپور میں ہی کھیلے گئے دوسرے میچ میں افغانستان کی ٹیم نے ہانگ کانگ کو چھ وکٹوں سے شکست دے کر ورلڈ ٹی 20 کرکٹ ٹورنامنٹ کے کوالیفائنگ راؤنڈ میں اپنی دوسری کامیابی حاصل کی تھی۔

اسی بارے میں