میڈل کے ساتھ ساتھ شادی کی پیشکش

تصویر کے کاپی رائٹ EPA

دنیا میں لوگ شادی کی پیشکش کے لیے بہت سے اہم مواقع کا انتخاب کرتے ہیں اور چینی ڈائیور ہے زی کے بوائے فرینڈ نے اس اعلان کے لیے ریو میں جاری اولمپکس کو چنا۔

ہے زی نے اتوار کو ریو میں خواتین کے تین میٹر سپرنگ بورڈ مقابلے میں چاندی کا تمغہ جیتا تھا۔

تاہم انھیں اس سے بڑی خوشی اس وقت ملی جب میڈل دیے جانے کی تقریب کے بعد سوئمنگ ایرینا میں موجود ہزاروں شائقین اور ٹی وی پر دیکھنے والے کروڑوں افراد کے سامنے ہے زی کے بوائے فرینڈ اور چینی ڈائیونگ ٹیم کے رکن چن کے نے انھیں شادی کی پیشکش کر ڈالی۔

تصویر کے کاپی رائٹ Reuters

گذشتہ ہفتے چین کے لیے کانسی کا تمغہ جیتنے والے چن کے کی قسمت نے یہاں بھی ان کا ساتھ دیا اور ہے زی نے ہاں کہہ دی۔

ہے زی کا کہنا تھا کہ ’ہم چھ برس سے ساتھ ہیں لیکن میرے خواب و خیال میں بھی نہیں تھا کہ وہ آج مجھے یہاں شادی کی پیشکش کرے گا۔‘

انھوں نے کہا کہ ’چن کے بہت سے باتیں کر چکے ہیں، انھوں نے بہت سے وعدے کیے ہیں لیکن جو بات میرے دل کو لگی ہے وہ یہ کہ میں ساری زندگی ان پر اعتبار کر سکتی ہوں۔‘

تصویر کے کاپی رائٹ EPA

چن نے شادی کی پیشکش کے لیے تمغے دیے جانے کی تقریب کا انتخاب کیا اور جب ان کی گرل فرینڈ کو چاندی کا تمغہ مل چکا تو وہ انگوٹھی لیے آگے بڑھے اور ہے زی کے سامنے گھٹنا ٹیک کر انھیں شادی کی پیشکش کر دی۔

اس موقع کو وہاں موجود درجنوں کیمرہ مینز نے اپنے کیمروں میں محفوظ کر لیا اور ابتدا میں تو ہے زی نے اپنے ہاتھ سے چہرہ چھپا لیا اور چند لمحوں کے انتظار کے بعد انھوں نے یہ پیشکش قبول کر لی۔

اس کے بعد چن نے ہے کو انگوٹھی پہنائی اور دونوں ایک دوسرے کے گلے لگ گئے۔

تصویر کے کاپی رائٹ AP

لیکن شادی کی اس پیشکش پر سوشل میڈیا پر ملا جلا ردعمل دیکھنے کو ملا۔

بی بی سی کے فیس بک صفحے پر کچھ صارفین کا خیال تھا کہ اس پیشکش نے ہے زی کی اولمپک میڈل جیتنے کی اہمیت پسِ پردہ چلی گئی تاہم کچھ لوگوں کا یہ بھی کہنا تھا کہ اس نے اس خوشی کو دوبالا کر دیا۔