آسٹریلیا میں مالک مکان نے چور کی پیٹھ پر تیر چلا کر اسے زخمی کر دیا

تصویر کے کاپی رائٹ Getty Images
Image caption آسٹریلیا میں تیر کمان رکھنے پر کوئی پابندی نہیں ہے

آسٹریلیا میں پولیس کا کہنا ہے کہ ایک شخص نے اپنے گھر میں چوری کرتے ہوئے ایک شخص کو پیٹھ پر تیر مار کر زخمی کر دیا ہے۔

چور نے اتوار کو آسٹریلیا کے شہر سڈنی میں واقع گھر سے کیش، گاڑی کی چابیاں، اور دوسری اشیا چوریں کیں۔

جب چور گاڑی چوری کرنے لگا تو گھر کے 68 سالہ مالک نے لکڑی کی کمان سے اسے روکنے کی کوشش کی۔

چور نے گاڑی کو چھوڑ کر باڑ پھلانگی اور جب وہ ایک گاڑی میں بیٹھنے کی کوشش کر رہا تھا گھر کے مالک نے اس پر تیر چلا دیا، جو اس کی پیٹھ کے نچلے حصے پر لگا۔

وہ اس گاڑی میں فرار ہو گیا۔ ابھی تک یہ معلوم نہیں ہو سکا ہے کہ اس کا زخم کتنا گہرا ہے۔

'نیو ساؤتھ ویلزکے ایک پولیس ترجمان نے بی بی سی کو بتایا کہ جائے وقوع سے کئی اشیا قبضے میں لی گئی ہیں جن میں تیر اور کمان بھی شامل ہیں۔

ترجمان نے کہا کہ 'ہمیں لگتا ہے کہ تیر ابھی بھی زخمی شخص کے پاس ہے۔'

اگر کوئی شخص کسی کے گھر گھسنے کی کوشش میں مالک مکان کے ہاتھوں زخمی یا ہلاک ہو جائے تو آسٹریلیا کے قوانین مالک مکان کی کوئی خاص حمایت نہیں کرتے۔ اس میں یہ دیکھا جاتا ہے کہ آیا اس نے اپنا دفاع کرتے ہوئے ایسا کیا یا ضرورت سے زیادہ طاقت استعمال کی۔

نیو ساؤتھ ویلز میں لکڑی کے تیر کمان رکھنے پر کوئی پابندی نہیں اور ان کے لیے کوئی لائسنس یا پرمٹ نہیں لینا پڑتا۔

اسی بارے میں