'ناک ٹین' سمندری طوفان فلپائن سے ٹکرا گیا

فلپائن تصویر کے کاپی رائٹ EPA
Image caption مقامی باشندوں کو عارضی پناہ گاہوں میں جانے کے لیے کہا گيا ہے

فلپائن کے مشرقی علاقے میں ناک ٹین نامی سمندری طوفان ٹکرایا ہے جس کے ساتھ 255 کلومیٹر فی گھنٹہ کی رفتار سے ہوائیں چلیں۔

حکام نے یکال کے علاقے سے ہزاروں باشندوں سے پہلے ہی طوفان کے پیش نظر اپنے گھر بار چھوڑ کر محفوظ مقامات پر چلے جانے کا کہا تھا۔

ناک ٹین نامی طوفان مشرقی فلپائن میں رات ساڑھ دس بجے جی ایم ٹی کو ٹکرایا۔

اس سے قبل درجنوں بندرگاہیں بند کر دی گئی تھیں کیونکہ اس طوفان میں دو میٹر اونچی خطرناک اور مہلک لہریں اٹھنے کا خدشہ ظاہر کیا گيا تھا۔

دو ماہ قبل سپر ٹائفون ہیما ملک سے ٹکرایا تھا جس کے ہاتھوں چار افراد ہلاک ہو گئے تھے۔

اتوار کی صبح نوک ٹین یا نینا نامی طوفان کیتندوانیس جزیرے سے 195 کلومیٹر مشرق میں تھا۔

بیکول کے علاقے میں شہری دفاع کے دفتر کی ترجمان ریچل میرانڈا نے خبررساں ادارے اے ایف پی کو بتایا کہ حفظ ماتقدم کے طور پر کیتندوانیس اور اس کے آس پاس کے صوبوں میں لوگوں کو اپنے گھر بار چھوڑنے کے لیے کہا گیا ہے۔

دارالحکومت منیلا میں حکام نے بڑے بڑے اشتہاری بورڈ کو ہٹانے کا حکم دیا ہے کیونکہ ہوا کے زور سے ان کے گرنے اور اس کے نتیجے میں شہریوں کے زخمی ہونے کے خطرات ہیں۔

اس طوفان کو دوسرے اور تیسرے درجے کے طوفان میں رکھا گيا ہے تاہم یہ کہا جا رہا ہے کہ ساحل سے ٹکرانے سے پہلے اس کا زور کم ہو جائے گا۔

خیال رہے کہ سنہ 2013 میں آنے والے طوفان ہیان میں 7350 جانیں تلف ہوئی تھیں۔

متعلقہ عنوانات

اسی بارے میں