’کم جونگ نام اعصاب شکن زہر کا نشانہ بنے‘

کم جانگ تصویر کے کاپی رائٹ AP
Image caption شمالی کوریا نے کم جونگ نام کی لاش کا پوسٹ مارٹم کرنے پر ملائیشیا پر مذموم مقاصد کا الزام عائد کیا ہے

ملائیشیا کا کہنا ہے کہ شمالی کوریا کے سربراہ کم جونگ ان کے سوتیلے بھائی کم جونگ نام کو اعصاب شکن زہریلے مادے 'وی ایکس نرو ایجنٹ' کے ذریعے ہلاک کیا گیا۔

کم جونگ نام گذشتہ ہفتے اس وقت ہلاک ہو گئے تھے جب دو خواتین نے کوالالمپور کے ہوائی اڈے پر حملہ کر کے ان کے چہرے پر زہریلا مواد پھینک دیا تھا۔

شمالی کوریا سفارتکار تک رسائی دے: ملائیشیا

’کم جونگ ان کے سوتیلے بھائی کوالالمپور میں ہلاک‘

کم جونگ نام کی ہلاکت، ایک اور مشتبہ خاتون گرفتار

زہر کی نوعیت معلوم کرنے کے لیے کی جانے والی رپورٹ میں کہا گیا ہے کہ کم جونگ نام کے چہرے پر پھینکے جانے والا کیمیکل وی ایکس نرو ایجنٹ ہے جسے اقوام متحدہ بڑے پیمانے پر تباہی پھیلانے والے ہتھیاروں کے زمرے میں شمار کرتی ہے۔

ملائیشیا نے اس قتل کا الزام شمالی کوریا پر عائد تو نہیں کیا تاہم اس کا کہنا ہے کہ شمالی کوریا واضح طور پر اس کے پیچھے ہے۔

کم جونگ نام پر یہ حملہ 13 فروری کو ہوا تھا اور وہ ہسپتال پہنچنے سے قبل ہی چل بسے تھے۔

تصویر کے کاپی رائٹ REX/SHUTTERSTOCK
Image caption زیر حراست چار افراد میں شامل خاتون جنھوں نے مبینہ طور پر مسٹر کم پر زہریلا مادہ پھینکا

ان کی لاش اب بھی ہسپتال کے سرد خانے میں پڑا ہوئی ہے اور اس کے حصول کے لیے کسے دعویٰ کرنا چاہیے، اس حوالے سے ایک سفارتی تنازع پیدا ہو چکا ہے۔

شمالی کوریا نے کم جونگ نام کی لاش کا پوسٹ مارٹم کے اصرار کرنے پر ملائیشیا پر مذموم مقاصد کا الزام عائد کیا ہے۔

واضح رہے کہ وی ایکس کو شدید مہلک مادہ تصور کیا جاتا ہے۔ یہ ہلکے زرد رنگ کا ہوتا ہے تاہم اس کا کوئی ذائقہ نہیں ہوتا اور یہ چند ہی منٹ میں انسان کو موت کے منہ میں لے جاتا ہے۔

اس کی زد میں آنے والے افراد کے جسمانی اعضا تیزی سے کام کرنا چھوڑ دیتے ہیں۔

کم جونگ نام کی ہلاکت کے حوالے سے چار افراد ملائیشیا میں زیرِ حراست میں جن پر یہ شک کیا جا رہا ہے کہ وہ مبینہ طور پر اس میں ملوث ہیں۔

کم جونگ نام کے قتل میں تفتیش کے لیے سات افراد کے نام سامنے آئے ہیں جن تمام کا تعلق شمالی کوریا سے ہے۔

ان میں سے تین اہم افراد اس وقت بھی ملائشیا میں موجود ہیں۔ جن میں شمالی کوریا کے ملائیشیا میں موجود سفارت خانے کے نائب سیکریٹری، شمالی کوریا کی قومی فضائی کمپنی کے سٹاف ممبر اور جیمز نامی شخص شامل ہیں جب کہ دیگر چار افراد کے بارے میں کہا گیا ہے کہ وہ پیونگ یانگ جا چکے ہیں۔

اسی بارے میں