ایف بی آئی کو خبر کو ’ٹھنڈا‘ کرنے کے لیے کہا گیا

تصویر کے کاپی رائٹ Reuters
Image caption صدر ٹرمپ نے ایک بار پھر سے ایف بی پر یہ کہہ کر نکتہ چینی کی ہے کہ وہ اپنے ہی محکمے کے راز افشان کرنے والوں کو روکنے میں ناکام ہے

وائٹ ہاؤس نے تصدیق کی ہے کہ ٹرمپ انتظامیہ کے ایک اہلکار نے ایف بی آئی سے اس رپورٹ کو غیر مصدقہ قرار دینے کے لیے کہا تھا جس کے مطابق صدارتی انتخابات کے دوران ٹرمپ کے بعض ساتھی روسی خفیہ اداروں کے ساتھ مسلسل رابطے میں تھے۔

وائٹ ہاؤس نے تسلیم کیا ہے کہ چیف آف سٹاف رائنس پرائبس نے امریکہ کے وفاقی خفیہ ادارے ایف بی آئی کے نائب ڈائریکٹر سے اخبار نیویارک ٹائمز کی اس خبر کی تردید کرنے کو کہا تھا جس میں روس کے ساتھ مبینہ رابطوں کی بات کہی گئی ہے۔

نجی ٹی وی چینل سی این این نے اطلاع دی ہے کہ ایف بی آئی نے وائٹ ہاؤس کے اس مطالبے کو یہ کہہ کر مسترد کر دیا ہے کہ صدر ٹرمپ کے معاونین اور روسی ایجنٹوں کے درمیان کے تعلقات کے بارے ميں ابھی تفتیش مکمل نہیں ہوئی ہے۔

ادھر صدر ٹرمپ نے ایک بار پھر سے ایف بی آئی پر یہ کہہ کر نکتہ چینی کی ہے کہ وہ اپنے ہی محکمے کے راز افشا کرنے والوں کو روکنے میں ناکام ہے۔

انھوں نے ایک ٹویٹ میں کہا: ’ایف بی آئی قومی سلامتی کا راز افشا کرنے والوں کو روکنے میں پوری طرح ناکام رہی ہے، جو میری حکومت کے خلاف شروع ہی سے چیزيں لیک کرتی رہی ہے۔‘

تصویر کے کاپی رائٹ AP
Image caption ڈونلڈ ٹرمپ کے مشیر برائے قومی سلامتی جنرل مائیکل فلن نے امریکی پابندیوں کے بارے میں روسی حکام سے بات چیت کے الزامات پر استعفیٰ دے دیا تھا

جمعے تک ایف بی آئی کی جانب سے اس معاملے پر کوئی باضابطہ بیان جاری نہیں کیا گیا۔

وائٹ ہاؤس کے پریس سکریٹری شان سپائسر نے سی این این کی خبر کو مسترد کرتے ہوئے کہا کہ ’ہم نے سٹوری کو گرانے کی بات نہیں کہی ہے بلکہ سچ بتانے کی بات کہی ہے۔‘

امریکی صدر ڈونلڈ ٹرمپ ملک کے انٹیلیجنس اداروں اور میڈیا کو ان کی ٹیم اور روس کے درمیان رابطوں کی خبروں کے حوالے سے کڑی تنقید کا نشانہ بناتے رہے ہیں۔

ڈونلڈ ٹرمپ نے پہلے بھی قومی سلامتی کے ادارے این ایس اے اور ایف بی آئی پر یہ معلومات غیر قانونی طور پر افشا کرنے کا الزام عائد کیا تھا۔

یاد رہے کہ امریکی صدر ڈونلڈ ٹرمپ کے مشیر برائے قومی سلامتی جنرل مائیکل فلن نے امریکی پابندیوں کے بارے میں روسی حکام سے بات چیت کے الزامات پر استعفیٰ دے دیا تھا۔

صدر ٹرمپ نے کہا کہ این ایس اے اور ایف بی آئی نے ان تعلقات کے حوالے سے خبریں میڈیا کو افشا کیں۔

انٹیلیجنس حکام نے اس سے پہلے کہا تھا کہ ان کے خیال میں روس نے انتخابات کو ٹرمپ کے حق میں کرنے کی کوشش کی تھی جبکہ ماسکو نے ان دعوؤں کی تردید کرتے ہوئے انہیں غیر مصدقہ قرار دیا بھا۔

متعلقہ عنوانات

اسی بارے میں