ترکی کا ہالینڈ کے سفیر کو روکنے سمیت کئی جوابی اقدامات کا اعلان

ترکی تصویر کے کاپی رائٹ Getty Images

ترکی نے ہالینڈ کی جانب سے اس کے وزرا کو ریفرینڈم کے لیے مہم چلانے سے روکنے کے بعد کئی جوابی اقدامات کا اعلان کیا ہے۔

ترک نائب وزیر اعظم نعمان کرتلمش نے کہا ہے کہ ہالینڈ کے سفیر کو انقرہ واپس آنے سے روکا جائے گا اور اعلیٰ سطح کے سیاسی مذاکرات منسوخ کیے جائیں گے۔

خیال رہے کہ ترکی کی جانب سے جرمنی، آسٹریا، سوئٹرزلینڈ اور ہالینڈ میں ریلیاں نکالنے کی کوشش کو روکا گیا ہے۔

اس حوالے سے ترکی نے ہالینڈ کے سفارتخانے میں باقاعدہ طور پر اپنا احتجاج ریکارڈ کروایا ہے۔

ترکی کے صدر رجب طیب اردوغان نے ان ممالک پر 'نازی' ہونے کا الزام لگایا تھا جس کے باعث سفارتی کشیدگی پیدا ہوئی ہے۔

استنبول میں بی بی سی کے مارک لوون کا کہنا ہے کہ دو نیٹو اتحادی ترکی اور ہالینڈ اس وقت ’غیر معمولی سفارتی بحران میں ہیں۔‘

پیر کو نعمان کرتلمش کا کہنا تھا کہ ’ہم بالکل وہی کر رہے ہیں جو انھوں نے ہمارے ساتھ کیا۔ ہم ہالینڈ کے سفیروں یا ایلچیوں کو لانے والے طیاروں کو ترکی میں اترنے یا ہماری فضائی حدود استعمال کرنے نہیں دیں گے۔‘

ان کا کہنا تھا کہ ’اس قسم کے بحران پیدا کرنے والے ہی اس کو ٹھیک کرنے کے ذمہ دار ہیں۔‘

دریں اثنا جرمن چانسلر انگیلا میرکل نے ہالینڈ کو ’مکمل حمایت اور ساتھ دینے کا کہا ہے۔‘

اس سے قبل ہالینڈ کی وزارتِ خارجہ کی طرف سے جاری کی گئی ہدایات میں ترکی میں موجود ہالینڈ کے شہریوں کو محتاط رہنے کو کہا گیا تھا۔

تصویر کے کاپی رائٹ AP
Image caption ترکی نے ہالینڈ کے سفارتخانے ساتھ باقاعدہ طور پر اپنا احتجاج ریکارڈ کروایا ہے

دوسری جانب ہالینڈ کے وزیر اعظم مارک روٹا نے ترک صدر کے بیان کو 'ناقابل قبول' قرار دیا جبکہ جرمنی کے وزیرِ خارجہ نے کہا کہ انھیں امید ہے کہ ترکی 'اپنے حواس بحال کر لے گا۔'

ہالینڈ کے نائب وزیرِاعظم لوڈویجک آشر نے ترک صدر کے بیان کے جواب میں کہا ہے کہ ’ ایک ایسی حکومت جو انسانی حقوق کے حوالے سے پیچھے جارہی ہے، اس کی جانب سے ہمیں نازی کہا جانا قابلِ نفرت ہے۔‘

دوسری جانب ڈنمارک کے رہنما نے صدر اردوغان سے اپنی طے شدہ ملاقات ملتوی کردی ہے۔

ڈینش وزیر اعظم لارس لوکے راسموسین نے کہا انھیں اس بات پر تشویش ہے کہ ترکی میں 'جمہوری اقدار شدید دباؤ میں ہیں۔'

خیال رہے کہ ترکی میں 16 اپریل کو صدر کے اختیارات میں اضافے کے لیے جو ریفرینڈم منعقد کیا جا رہا ہے اس کے تحت ترکی کو پارلیمانی طرز حکومت کے بجائے امریکہ کی طرح صدارتی طرز حکومت میں تبدیل کرنے کے بارے میں فیصلہ کیا جائے گا۔

یورپی ممالک میں آباد ترکوں کی ووٹنگ میں شرکت کی حوصلہ افزائی کرنے کے لیے ترک حکومت مختلف یورپی ممالک میں ریلیاں منعقد کر رہی ہے تاکہ صدر کے اختیارات میں اضافے کے حق میں ووٹ حاصل کیے جا سکیں۔

اسی بارے میں