پیرس: ہوائی اڈے پر فوجی سے بندوق چھیننے والے شخص کو گولی مار دی گئی

تصویر کے کاپی رائٹ Getty Images

فرانس میں حکام کا کہنا ہے کہ پیرس کے اورلی ہوائی اڈے پر ایک فوجی اہلکار سے بندوق چھیننے کی کوشش کرنے والے شخص کو گولی مار دی گئی ہے۔

حکام کا کہنا ہے کہ زاید بن بلغاسم نامی اس شخص نے ایک خاتون فوجی کے سر پر بندوق تعنی اور اس کا کہنا تھا کہ وہ ’اللہ کے لیے جان دینا چاہتا‘ ہے۔

پیرس: آئی ایم ایف کے دفتر میں ’لیٹر بم‘ دھماکہ

اس سے قبل سنیچر کو یہ 39 سالہ فرد پیرس میں فائرنگ کے ایک واقعے اور کار چوری میں ملوث تھا۔

زاید بن بلغاسم کو ماضی میں شدت پسندی کے حوالے سے رپورٹ کیا جا چکا ہے اور وہ سیکورٹی اداروں کی واچ لسٹ پر بھی تھا۔

تصویر کے کاپی رائٹ EPA
Image caption یاد رہے کہ یہ حملے ایک ایسے وقت ہوا ہے جب فرانس میں آئندہ ماہ صدارتی انتخابات ہونے والے ہیں اور ملک ایمرجنسی کی صورتحال میں ہے۔

پیرس میں پراسکوٹر فرینسز مولنز کا کہنا ہے کہ زاید بن بلغاسم ماضی میں ڈکیتیوں اور منشیات فروشی کے جرائم میں بھی ملوث رہا ہے۔

خیال کیا جا رہا ہے کہ جیل میں سزا کاٹنے کے دوران وہ اسلامی شدت پسندی کی طرف مائل ہوا۔

یاد رہے کہ یہ حملے ایک ایسے وقت ہوا ہے جب فرانس میں آئندہ ماہ صدارتی انتخابات ہونے والے ہیں اور ملک ایمرجنسی کی صورتحال میں ہے۔

اورلی ہوائی اڈے پر تعینات فوجی آپریشن سنٹینل کا حصہ تھے جنھیں جنوری 2015 میں چارلی ہیبڈو حملوں اور نومبر 2015 میں پیرس حملوں کے بعد پولیس کی مدد کے لیے تعینات کیا گیا تھا۔

اس واقعے کے بعد ہوائی اڈے کے پیشتر حصوں کو خالی کروا لیا گیا تھا۔ گولیوں کی آواز سننے کے بعد جہازوں میں سوار مسافروں کو اترنے سے روک دیا گیا۔ اس کارروائی کے دوران تقریباً 3000 مسافر اور متعدد پروازیں متاثر ہوئیں۔ تاہم اطلاعات کے مطابق ٹرمینل کو کھول دیا گیا ہے اور معمول کی پروازیں بحال ہوگئی ہیں۔

یہ ہوائی اڈہ پیرس کا دوسرا بڑا ہوائی اڈہ ہے۔

اسی بارے میں