ٹرمپ میکسیکو کی سرحد پر دیوار کی تعمیر کے لیے رقم حاصل کرنے میں ناکام

دیوار تصویر کے کاپی رائٹ AFP
Image caption اپنی انتخابی مہم کے دوران صدر ٹرمپ نے میکسیکو کی سرحد پر دیوار کی تعمیر کا وعدہ کیا تھا

امریکی صدر ڈونلڈ ٹرمپ نے اس بات کا اشارہ دیا ہے کہ وہ رواں ہفتے اخراجاتی بل میں میکسیکو سے متصل سرحد پر دیوار کی تعمیر کے لیے رقم حاصل کرنے کے منصوبے سے دستبردار ہوجائیں گے۔

صدر ٹرمپ کے قریبی مشیر کیلین کونوے کا کہنا ہے کہ دیوار کی تعمیر کے لیے اخراجات بجٹ میں شامل نہیں کیے جائیں گے جو جمعے تک ہرصورت منظور کیا جانا ہے۔

’میکسیکو کی سرحد پر دیوار وقت سے پہلے تعمیر ہوگی‘

’ٹیکس عائد کرنے سے امریکی ہی دیوار کے اخراجات دیں گے‘

’میکسیکو سے درآمدات پر ٹیکس‘

خیال رہے کہ ڈونلڈ ٹرمپ نے اپنی انتخابی مہم کے دوران میکسیکو کی سرحد پر دیوار کی تعمیر کا وعدہ کیا تھا۔

ڈیموکریٹس نے دھمکی دی تھی کہ اگر دیوار کے لیے رقم مختص کی گئی تو وہ اس بل کو روک لیں گے۔ دیوار کے لیے رقم مختص نہ کرنے کے فیصلے سے اب تعطلِ حکومت کا خطرہ ٹل گیا ہے۔

تاہم صدر ٹرمپ نے ٹوئٹر پر اصرار کیا ہے کہ وہ اب بھی دیوار کی حمایت کرتے ہیں اور اس کی تعمیر کی جائے گی۔

مبینہ طور پر انھوں نے پیر کو کنزرویٹو میڈیا کے نمائندگان سے نجی ملاقات کے دوران کہا کہ وہ رواں سال کے آخر تک دیوار کے لیے فنڈنگ حاصل کر سکتے ہیں۔

اور کیلین کونوے نے فاکس نیوز سے بات کرتے ہوئے تصدیق کی کہ اس دیوار کی تعمیر کے لیے اس ہفتے رقم حاصل کرنے کی ضرورت نہیں ہے لیکن یہ ان کی اہم ترجیح رہے گی۔

تصویر کے کاپی رائٹ AFP
Image caption وائٹ ہاؤس کا اصرار ہے کہ دیوار ضرور تعمیر ہوگی

صدر ٹرمپ نے دیوار کی تعمیر کے لیے ڈیڑھ ارب ڈالر کی تجویز کانگریس کے ذریعے اخراجاتی بل کے حصے کے طور پر پیش کی تھی، جو وفاقی اداروں کو مالیاتی سال کے اختتام پر رقوم فراہم کرتا ہے۔

اس منصوبے کو ڈیموکریٹس کی مخالفت کا سامنا ہے۔

جبکہ کچھ رپبلکنز نے دیوار کی تعمیر کا خرچ 21.6 ارب ڈالر بتایا ہے جو کہ صدر ٹرمپ کی جانب سے بتائے گئے 12 ارب ڈالر سے کہیں زیادہ ہے۔

تاہم وائٹ ہاؤس نے ایک بار پھر اصرار کیا ہے کہ دیوار ضرور تعمیر ہوگی، اور اس میں ’دیر‘ ہوگی لیکن وہ اس سے پیچھے نہیں ہٹیں گے۔

وائٹ ہاؤس کے ترجمان شان سپائسر کا کہنا تھا کہ '’رجیحات تبدیل نہیں ہوئیں۔ دیوار تعمیر کی جائے گی۔‘

ان کا کہنا تھا کہ یہ انسانی سمگلنگ، غیرقانونی منشیات اور غیرقانونی امیگریشن کو روکنے کے لیے ضروری ہے۔

اسی بارے میں