سمگلرز نے ڈرونز کے ذریعے پولیس کی نگرانی کی!

تصویر کے کاپی رائٹ AFP

آسٹریلوی حکام کا کہنا ہے کہ عالمی سطح پر منشیات سمگل کرنے والے ایک گروہ نے بڑی تعداد میں کوکین سمگل کرنے کے لیے ڈرون کے ذریعے پولیس کی نگرانی کی۔

پولیس کا کہنا ہے کہ یہ منشیات جن کی قیمت تین کروڑ آسٹریلین ڈالرز تھی، کو پاناما سے میلبرن آنے والے بحری جہاز میں ایک کنٹینر میں لایا گیا۔

سمگلنگ کی اس کوشش میں چار آسٹریلین، دو کینیڈین اور ایک برطانوی شہری کو گرفتار کیا گیا ہے۔

پولیس نے منشیات کے علاوہ پانچ لاکھ 80 ہزار آسٹریلین ڈالر بھی ضبط کیے ہیں۔

آسٹریلین فیڈرل پولیس کمشنر جان بیوریج کا کہنا ہے کہ جس طریقے سے پولیس کی نگرانی کرنے کے لیے ڈرون کا استعمال کیا گیا اس سے ظاہر ہوتا ہے کہ منشیات کے سمگلر وقت کے ساتھ ساتھ جدید طریقے استعمال کر رہے ہیں۔

انھوں نے کہا 'سمگلرز نے تفتیش کاروں کی نگرانی کے لیے ڈرونز کا استعمال کیا۔'

پولیس کمشنر نے تفتیش کاروں کی جانب سے سمگلرز کی نگرانی کی کوششوں کو ناکام بنانے کے لیے کی جانے والی کاوشوں کو سراہا۔

میلبرن پہنچنے والے بحری جہاز 'سپیرٹ آف شنگھائی' سے پکڑے جانے والے تین بیگوں میں سے 92 کلو کوکین برآمد ہوئی۔

پولیس نے پانچ لاکھ 80 ہزار آسٹریلین ڈالرکی رقم اس وقت ضبط کی جب جمعرات کو میلبرن میں ایک مکان پر دھاوا بولا گیا۔

پولیس کے مطابق جن سات افراد کو گرفتار کیا گیا ہے ان کی عمریں 21 سے 33 سال کے درمیان ہیں۔

متعلقہ عنوانات